Олий лига 3-турнинг қолдирилган ўйини доирасида "Бунёдкор" ўз майдонида "Насаф"ни қабул қилди.
Илк дақиқалардан Рўзиқул Бердиев шогирдлари тўп билан кўпроқ муомалада бўлган бўлса-да, ҳисобни мезбонлар очишди. Марказий ҳимояда хато натижасида Элдор Шомуродов баҳснинг 21-дақиқасида ҳисобни очди. Эътиборли томони, Ўзбекистон терма жамоаси футболчиси учун бу гол Олий лиганинг ушбу мавсумидаги илк гол бўлди.
Қаршиликлар танаффусга қадар ҳисобни тенглаштиришга муваффақ бўлишди. Баҳром Абдураҳимов ҳужумни бошлади ва тўпни чап қанотдаги Сайфиевга узатди. Фаррух юқоридан етказган узатмани паст бўйли Баҳромнинг ўзи бош билан дарвозага жойлаб қўйди.
Иккинчи бўлимда "қалдирғочлар" яна ҳисобда олдинга ўтиб олишди. Шаҳзодбек Нурматов 18 метрлардан берган зарба натижасида тўп рекошет ҳолатида меҳмонлар дарвозасига бориб тушди. Баҳс тугашига 6 дақиқа қолганида "Насаф" яна ҳисобни тенглаштирди. Жаримадан етказилган узатмани Драган Черан бош билан дарвозани ишғол қилди.
Ўйиннинг сўнгги дақиқаларида омад туфайли "Бунёдкор" нафақат мағлубиятдан қутулиб қолди, балки ғалабани ҳам илиб кетди. Дастлаб Кенжабоевнинг мураккаб зарбасини Зуҳуров қийинчилик билан қайтарган бўлса, Шаҳбоз Эркиновнинг зарбаси дарвоза устунига тегиб қайтди. Асосий вақтнинг сўнгги дақиқасида эса Шомуродов етказган узатмани ҳужумга қўшилган Аҳмадалиев бош билан "Насаф" дарвозасига жойлади.
Ушбу ғалаба туфайли "Бунёдкор" ўз очколарини 21тага етказди ва жадвалда 7-ўринга кўтарилиб олди. "Насаф" эса 26 очко билан биринчи даврани 3-ўринда якунлади.
Олий лига, 3-турнинг қолдирилган ўйини
19:00: "БУНЁДКОР" - "НАСАФ" 3:2
Голлар: Элдор Шомуродов (21), Шаҳзодбек Нурматов (61), Дилшод Аҳмадалиев (90) — Баҳром Абдураҳимов (35), Драган Черан (84)
“Бунёдкор”: 25.Муроджон Зуҳуров (с), 2.Рустамжон Ашурматов, 4.Акрамжон Комилов, 8.Жовлон Иброҳимов, 9.Шахзодбек Нурматов, 10.Элдор Шомуродов, 17.Достонбек Ҳамдамов, 19.Нурилло Тўхтасинов, 21.Дилшодбек Аҳмадалиев, 28.Давронбек Умиров, 29.Отабек Шукуров.
Захира: 55.Элдор Адҳамов, 15.Фаррух Икромов, 16.Алишер Саноев, 20.Сардорбек Азимов, 31.Миржаҳон Мираҳмадов, 34.Сухроб Иззатов, 97.Жавоҳир Эсонқулов.
“Насаф”: 25.Элдорбек Суюнов, 2.Акмал Шораҳмедов, 4.Мақсуд Каримов, 6.Азиз Ғаниев, 10.Дилшод Раҳматуллаев, 18.Баҳром Абдураҳимов, 20.Ислом Кенжабоев, 22.Игорь Голбан, 23.Шерзод Аъзамов (с), 34.Фарруҳ Сайфиев, 69.Драган Черан.
Захира: 35.Снжар Қувватов, 7.Одилжон Ҳамробеков, 8.Сирожиддин Қўзиев, 9.Дилшод Хушбаков, 15.Шахбоз Эркинов, 27.Ислом Рашидхонов, 31.Сайдулло Раҳматов.
Ҳакамлар: Равшан Эрматов (Тошкент), Абдуҳамидулло Расулов, Жаҳонгир Саидов (Тошкент), Дмитрий Клепиков (Тошкент)
| № | Жамоа | Ўйин | Ғалаба | Дуранг | Мағлубият | Т-Н | Очко |
|---|---|---|---|---|---|---|---|
| 1 | Локомотив | 15 | 11 | 2 | 2 | 36-10 | 35 |
| 2 | Қўқон-1912 | 15 | 7 | 6 | 2 | 23-16 | 27 |
| 3 | Насаф | 15 | 8 | 2 | 5 | 24-14 | 26 |
| 4 | Олмалиқ | 15 | 6 | 6 | 3 | 12-11 | 24 |
| 5 | Пахтакор | 15 | 7 | 3 | 5 | 19-19 | 24 |
| 6 | Бухоро | 15 | 7 | 2 | 6 | 25-21 | 23 |
| 7 | Бунёдкор | 15 | 5 | 6 | 4 | 16-16 | 21 |
| 8 | Машъал | 15 | 5 | 5 | 5 | 15-13 | 20 |
| 9 | Металлург | 15 | 6 | 2 | 7 | 20-19 | 20 |
| 10 | Қизилқум | 15 | 5 | 5 | 5 | 15-16 | 20 |
| 11 | Динамо | 15 | 5 | 4 | 6 | 18-18 | 19 |
| 12 | Навбаҳор | 15 | 4 | 7 | 4 | 16-19 | 19 |
| 13 | Сўғдиёна | 15 | 5 | 2 | 8 | 19-26 | 17 |
| 14 | Шўртан | 15 | 5 | 0 | 10 | 14-21 | 15 |
| 15 | Нефтчи | 15 | 2 | 5 | 8 | 12-25 | 11 |
| 16 | Обод | 15 | 2 | 3 | 10 | 10-30 | 9 |
