«Реал» ҳужумчиси Криштиану Роналду нафақат солиқ идораси билан, балки шахсий ҳаётидаги муаммолар билан ҳам курашишига тўғри келади.

Move Notícias хабарига кўра, Роналдунинг севгилиси Жоржина Родригес унинг яқин дўсти Мариса Мендеш билан мулоқот қилмай қўйган. Мариса футболчининг агенти Жорже Мендешнинг қизи бўлиб, кўп вақтини Роналду билан ўтказади. У Роналдунинг ижтимоий тармоқлардаги саҳифаларини юритади ва маркетинг тадбирларини ташкил қилади. Аввалроқ, Роналду ва Марисанинг ўртасида ишқий муносабатлар борлиги ҳақида ҳам хабарлар чиққан эди.

Буларнинг ҳаммаси Жоржинани асабийлаштирмоқда ва у Роналду билан Марисанинг мулоқотини чеклашга уринмоқда. Қизлар бир-бири билан умуман гаплашмайди, ҳатто ижтимоий тармоқларда ҳам алоқа ўрнатмаган. Масалан, Жоржина Роналдунинг ижтимоий тармоқлардаги барча дўстларини кузатиб боради, бироқ фақат Марисани эмас.

Айни пайтда Роналду қизларнинг можаросидан узоқлашиб қолган, чунки янги туғилган фарзандлари билан машғул. Бироқ, келажакда ҳар иккаласини яраштириб қўйишга жазм қилган, деб хабар беради Move Notícias.