«Ювентус» ҳимоячиси Леонардо Бонуччи Gazzetta dello Sport нашрининг бир саҳифасини тўлиғича сотиб олди.
«Милан» сафига ўтишга тайёргарлик кўраётган футболчи саҳифага «Ювентус» мухлислари билан хайрлашув хабарини жойлаштирди.
«Етти мавсум ортда қолди. Ажойиб муҳитга эга жамоа таркибидаги етти мавсумлик ғалаба. Олтита скудетто. Албатта, Чемпионлар лигасида ғалаба қозонолмаганимиз аламлидир. Аммо, қўлга киритилган ютуқлардан ва аҳил оила вакили бўлишдан фахрланиш туйғуси аламдан кучлироқ.
Мен ҳар бир ўйинда бор кучимни сарфлаб ҳаракат қилдим. Орқага назар солар эканман, клуб, жамоадошларим ва мухлислар билан бирга катта ғалабалар қувончини ҳис қилганимни кўрмоқдаман. Барчаси учун раҳмат «Юве» - дейилади Бонуччи баёнотида.
Италия матбуоти хабарига кўра, Бонуччи «Милан» билан 5 йиллик шартнома имзолайди. Унинг маоши 6,5 млн евро бўлади.
