ОЧ-2018 саралашидан ўрин олган БАА U23 - Ўзбекистон U23 (0:2) ўйинидан кейин, мезбонлар устози Ҳасан Ал-Абдулий ўз фикрларини айтди.

"Ўйиндан олдин ғалабага бўлган ишончимиз юқори эди. Дуранг ҳақида умуман ўйламаётгандик ҳам. Биринчи таймда ҳужумкор футбол намойиш эта олмаганимиз учун, иккинчисида ниманидир ўзгартиришга ҳаракат қилдик. Аммо рақиб бизга қараганда яхши ўйнади ва бизга ўзимизни кўрсатиш имконини бермади.

Ўзбекистонлик футболчилар жисмоний ва тактик томондан кучли кўринди. Уларнинг мураббийи турниргача 20 га яқин ўртоқлик учрашуви ўтказгани ва икки йилдан буён жамоа шаклланаётгани ҳақида айтди. Лекин бизнинг жамоа йиғилганига энди 37 кун тўлди. Бу ўз таъсирини кўрсатди. Мен буни мағлубиятга баҳона сифатида кўрсатмоқчи эмасман, албатта" - деди Ҳасан Ал-Абдулий, БАА U23 бош мураббийи.