«Манчестер Юнайтед» юлдузи Дуайт Йоркнинг молиявий аҳволи жуда оғирлиги маълум бўлди.

Собиқ ҳужумчининг гапига қараганда, унинг ҳисобида ҳозир 2 евро қолган. Июль ойининг бошида суд Dwight Yorke Promotions компаниясини тўловга қобил эмас деб топди. Энди собиқ футболчи катта муаммолардан қутулиб қолиши учун Чешир графлигидаги катта уйини сотишга мажбур. Йорк уни 2,26 млн еврога баҳоламоқда.

Бу билан Дуайтнинг муаммолари камайиб қолмайди. 2017 йил бошида у АҚШга кириш учун тақиқланган шахслар рўйхатига тушиб қолди. Гап шундаки, у 2015 йилда Эронга ташриф буюриб, ўртоқлик ўйинида иштирок этган эди. «Трамп қонуни»га кўра эса, бу мамлакат ҳудудида бўлган одамларга АҚШ дарвозалари ёпиқ.

Эслатиб ўтамиз, Дуайт Йорк 1998 – 2002 йилларда «МЮ» таркибида ўйнаб, 152 ўйинда 66та гол урган. Сўнгги икки йил давомида у BeIN Sports TV каналида эксперт бўлиб ишламоқда. Футболчи фаолияти давомида Тринидад ва Тобаго терма жамоаси, «Астон Вилла», «Блэкберн», «Бирмингем», «Сандерленд» клубларида ўйнаган.