«Реал» ҳужумчиси Криштиану Роналду Посуэло-де-Алакронга ташриф буюриб, солиқлардан бўйин товлаганлик иши бўйича судда кўрсатма берди.

Marca хабарига кўра, 32 ёшли футболчи 1,5 соат давомида прокурорларнинг саволларига жавоб берган ва ўзининг айбдорлигини тан олмаган. Бундан ташқари, Роналду судга ўз обрўсини ҳимоя қилиш учун ташриф буюрганини алоҳида таъкидлаган.

«Агар мен Криштиану Роналду бўлмаганимда, бу ерга келмасдим», – деб айтган футболчи La Sexta хабарида.

Эслатиб ўтамиз, Роналду Испания прокуратураси томонидан 2011-2014 йиллар давомида 14,8 миллион евро миқдоридаги солиқни тўлашдан бўйин товлаганликда айбланган эди.

Агар айби исботланса, унга 2 йиллик шартли қамоқ ёки 14,8 млн евро миқдоридаги жарима жазоси тайинланиши мумкин.