Олий лига 16-туридан ўрин олган "Нефтчи" - "Шўртан" (1:1) ўйинидан сўнг ғузорликлар мураббийи Генадий Кочнев ўйин ҳақида фикр билдирди.
"Биринчи ўринда, Вадим Абрамовни бугунги туғилган куни билан табриклаб қоламан. Ўйин ҳақида гапирадиган бўлсак, дастлабки 30 дақиқада рақиб бизни ўз зонамизда "қамаб" қўйди. Кейинчалик эса қарши ҳужумлар орқали ўйинни тенглаштира олдик. Афсуски, вазиятлардан фойдалана олмадик. Иккинчи бўлимда гол урганимиздан сўнг фарғоналиклар очиқ футбол намойиш этишга киришиди ва ҳисобни тенглаштиришга эришишди.
Бизда ҳам қулай вазиятлар кўп бўлди ва бугун ғалабага яқинроқ эдик. Йигитларга раҳмат айтаман. Чунки бугун улар охиргача курашди. Дарвозабонга эса пенальтини қайтаргани учун алоҳида раҳмат.
Бугун "Нефтчи"га нима етишмаганини билмадим. Рақиб ҳақида фикр билдирмайман. Лекин бизнинг ҳимоячилар ўз ишини яхши бажарди" - деди Кочнев.
