Бокс бўйича жаҳон чемпионатида умумжамоа ҳисобида ғолиблик учун Ўзбекистон ва Қозоғистон делегациялари ўртасида ўзаро кураш кечмоқда, десак хато бўлмайди. Ҳозирда чорак финалда Ўзбекистондан 9, Қозоғистондан 8 нафар боксчи рингга кўтарилади. Чорак финал босқичида 2та вазн тоифасида қўшни мамлакатларнинг спортчилари тўқнаш келишади. Мухлислар 81 кг. вазнда Мелиқўзиев - Алжанов, 91+ кг. вазнда Жалолов - Қўнқабоев тўқнашувларига гувоҳ бўлишади.

Қозоғистонлик Қамшибек Қўнқабоев sports.kz сайтига берган интервьюсида ўзбекистонлик рақибидан реванш олиш ниятида эканини таъкидлаб ўтди.

— Худо хоҳласа, Баҳодир Жалоловдан реванш олиш учун қўлдан келган барча ишни қиламан.

— Жалолов билан Осиё чемпионати финалида тўқнаш келиб, мағлуб бўлгандингиз. Ўшанда ғалаба учун нима етишмаганди?
— Битта сабабни айтиш қийин. Бу фаолиятимдаги илк халқаро мусобақа эди. Масъулият юки юқори эди. Назаримда, шундай бўлиши керак эди. Умид қиламан, Гамбург рингларида ундан реванш оламан.