«Пахтакор» футбол клуби моддий-техник базасини янада такомиллаштириш, унинг спорт машғулот ўқув комплексини тартибга солиш ҳамда тегишли объектларни халқаро стандартларга мувофиқлаштириш, шунингдек, юқори маҳоратли футболчиларни тайёрлашни таъминлаш, Ўзбекистон довруғини халқаро мусобақаларда муносиб намойиш этиш мақсадида Ўзбекистон Республикаси Президентининг 2017 йил 21 августдаги «Пахтакор» футбол клубининг моддий-техник базасини янада такомиллаштириш чора-тадбирлари тўғрисида»ги ПҚ-3127-сон Қарори қабул қилинди.
Ушбу ҳужжат «Пахтакор» клубини ҳар томонлама ривожлантириш, замонавий инфратузилмага эга жамоа даражасига олиб чиқишда муҳим дастуриламал бўлмоқда.
Мазкур Қарорга мувофиқ, Тошкент шаҳар ҳокимлиги, Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси, Ўзбекистон Республикаси Давлат жисмоний тарбия ва спорт қўмитаси, Ўзбекистон Республикаси Молия вазирлиги, Ўзбекистон Футбол Федерацияси ва инвестор сифатида «SFI Management Group» МЧЖнинг қуйидаги таклифлари маъқулланди:
«PAXTAKOR» спорт машғулот ўқув маркази» МЧЖ ва «PAXTAKOR TENNIS АСЕ» МЧЖларни қўшиб юборган ҳолда «PAXTAKOR» футбол клуби» МЧЖ номи билан қайта ташкил этиш;
«PAXTAKOR» футбол клуби» МЧЖ устав жамғармасининг 80 фоизини инвестиция мажбуриятлари бажарилиш шарти билан «нол» харид қийматида сотиш;
«PAXTAKOR» футбол клуби» МЧЖ устав жамғармасининг қолган 20 фоизини инвестор томонидан инвестиция мажбуриятлари бажарилгандан сўнг Тошкент шаҳар ҳокимиятида сақлаш.
Қарорда, хусусан, SFI Management Group клуб бино ва иншоотларини қуриш, реконструкция қилиш, жорий таъмирлаш ҳамда уларни халқаро меъёрларга мос ҳолатга келтириш, юқори малакали футболчилар тайёрлашни таъминлаш учун беш йил давомида 200 млрд. сўмдан кам бўлмаган маблағни йўналтириши лозимлиги кўрсатилган.
Клубдаги янгиланиш ва бунёдкорлик ишлари жараёнида «Қибрай» спорт базаси, «Чилонзор» спорт мажмуаси ҳамда футбол академияси тўлиқ реконструкция қилинади.
Клуб раҳбарияти бирмунча вақт илгари келгусидаги режалари ҳақида маълум қилганди. Хусусан, икки йил ичида эски «Пахтакор» стадиони ўрнида янги ва замонавий усти ёпиқ арена қурилиши режалаштирилган.
2017 йили ташкил этилган «SFI Management» МЧЖ ХК Ўзбекистон Республикаси ҳудудида қонун ҳужжатларида белгиланган талабларга биноан, юридик шахс сифатида рўйхатдан ўтган. Компания турли йирик инвестицион лойиҳаларда иштирок этмоқда ҳамда мамлакатимиз тараққиёти ва унинг иқтисодиёти равнақи йўлида ўз ҳиссасини қўшмоқда.
SFI Management Group компанияси кимга қарашли эканлиги ҳозирча аниқ эмас. Интернетдаги маълумотларга қараганда, компания хорижий корхона шаклидаги МЧЖ бўлиб, 2017 йил январда ташкил этилган ва консалтинг хизматлари кўрсатиш, инвестицион лойиҳаларни бошқариш билан шуғулланади.
Инвестор фақат ўзига юклатилган мажбуриятларни тўлиқ бажаргандан кейин устав жамғармасидаги ўз улушини тасарруф этиш ҳуқуқига эга бўлади. Унгача инвесторнинг сотиб олган улушига бўлган ҳуқуқи «тасарруф этиш ҳуқуқисиз» қайди билан мулк ҳуқуқига сертификат билан тасдиқланади. Мазкур сертификат «нол» харид қиймати бўйича улушнинг 80 фоизини олди-сотдиси бўйича шартнома тузилгандан бошлаб 5 кун ичида берилади. Инвестор ёки инвесторнинг муассиси томонидан МЧЖ манфаатлари йўлида олди-сотди шартномаси тузилгунга қадар ҳар қандай усулда киритладиган пул маблағлари инвестиция мажбуриятлари бажарилганини англатади.
2023 йил 1 январга қадар «PAXTAKOR» футбол клуби» МЧЖ инвестиция мажбуриятлари амалга оширилиши доирасида барча турдаги солиқлар ва давлат мақсади жамғармаларига (Молия вазирлиги ҳузуридаги бюджетдан ташқари Пенсия жамғармаси бундан истисно) мажбурий тўловлардан, МЧЖнинг чет эллик мутахассисларига тўланадиган меҳнат ҳақи кўринишидаги даромадлар қисмида ягона ижтимоий тўловдан озод қилинади.
