ПСЖ клуби Ла Лига раҳбари Хавьер Тебасга жавоб қайтарди.
Аввалроқ, мулозим парижликларни молиявий фэйр-плей қоидаларини қўпол тарзда бузганликда айблаган эди.
«Биз жаноб Тебаснинг туҳматга асосланган баёнотига жавоб бермоқчи эмасмиз. Унинг гаплари клубимизнинг истиқболли режасини барбод қилишга йўналтирилган. Бу баёнот билан у матбуотни бизга қарши қайрамоқчи бўляпти.
Шуни маълум қиламизки, ПСЖ ўз молиявий фаолияти ҳақида УЕФА ташкилотига батафсил ҳисобот тақдим қилган.
Испания футболи ПСЖ клубининг банк ҳисобрақами билан эмас, балки ўзига керакли бўлган бошқа истиқболли лойиҳалар билан шуғуллангани маъқул», - дейилади баёнотда.
