«Реал» бош мураббийи Зайниддин Зидан Европа чемпионлар лигасининг 4-тури доирасида «Тоттенхэм»га қарши бўлиб ўтган ўйин (1:3) борасида ўз фикрларини билдириб ўтди.

«Ҳаётда ҳамма нарсани борича қабул қилиш керак бўлади. Албатта, футболчиларнинг кайфияти яхши эмас. Мағлубият биз учун оғир зарба бўлди, лекин биз бунга муносиб эдик. «Тоттенхэм» ҳақли равишда ғалаба қозонди. Биз эса вазиятдан чиқиб кетишни биламиз.

Биз бугун ЕЧЛ баҳсини бой берган бўлсак, 3 кун аввал Испания чемпионатида ютқазгандик. Бундан хурсанд эмасмиз, бунга хурсанд бўлишга ҳақимиз йўқ. Ўзимизни ёмон ҳис қиляпмиз. Ғалаба қозонганингда — хурсанд бўласан. Мағлуб бўлганингда эса қовоқ солиб олиш керак эмас. Бу футбол. Олдимизда ўйинлар кўп ва вазиятни ўзгартириш имкониятига эгамиз.

Одамлар истаган нарсасини ўйлаши мумкин, аммо биз инқирозда эмас, бу руҳий тушкунлик эмас. Баъзида кам вазият яратиб, гол урасан. Бугун эса тескариси бўлди. Бизда ҳисобни тенглаштириш учун имкониятлар бўлди, аммо, бунинг ўрнига рақиб дарвозамизга 3та гол урди.

Рақиб бугун барча жиҳатдан бизга нисбатан яхшироқ кўринди. Мағлубиятимизнинг сабаби оддий — биз гол ура олмадик. Мен хавотирда эмасман. Жамоада тажрибали футболчилар, чемпионлар йиғилган. Ҳаммаси яхши бўлади», – деди Зидан.