Испания Ла лигасининг 11-тури доирасида "Барселона" ўз майдонида "Севилья"ни қабул қилди ва қийин ғалабани қўлга киритди.

Биринчи бўлимда устунлик тўлалигича "Камп Ноу" эгалари томонида бўлди. Баҳснинг 23-дақиқасида олис масофадан етказилган узатмани меҳмонлар ҳимоячиси ўз дарвозасига етказишда хатога йўл қўйди. Тўпни Пако Алькасер эгаллаб олиб, бирга-бир вазиятда "Севилья" посбонини доғда қолдирди.

Иккинчи бўлим бошида андалусиялик фаолликни оширишди ва бунинг учун мукофотланишди. Бурчакдан етказилган Писарро бош билан дарвозага жойлаб қўйди. Орадан кўп ўтмасдан Вальверде шогирдлари яна ҳисобда олдинга чиқиб олишга муваффақ бўлишди. Ракитич қанотдан етказиб берган узатмани яна ўша Алькасер дарвозага тўғрилаб қўйди.

Дублни расмийлаштирган Пако шу заҳоти захирага олинди. Ўйин эса 2:1 ҳисоби билан якунланди.

"Барселона" ўз очколарини 31тага етказиб, пешқадамлик қилишда давом этадиган бўлди.

Испания Ла лигаси, 11-тур
Барселона – Севилья 2:1 (1:0, 1:1)
Голлар: 1:0 – 23 Пако Алькасер, 1:1 – 59 Писарро, 2:1 – 65 Пако Алькасер.
Барселона – тер Стеген, Пике, Альба, Нелсон Семеду, Умтити, Ракитич (Маскерано, 90), Бускетс, Иньеста (Паулиньо, 60), Пако Алькасер (Деулофеу, 66), Месси, Суарес.
Севилья – Сория, Кьер (Гайс, 73), Эскудеро, Коршья, Лангле, Писарро, Нзонзи, Навас, Банега, Сарабия (Нолито, 62), Муриэль (Бен-Йеддер, 76).
Огоҳлантириш: Месси (90).