Испания Ла лигасининг 12-тури доирасида "Ванда Метрополитано" стадионида ўтказилган Мадрид дербиси доимгидек курашларга бой тарзда кечди.

Учрашувнинг дебютидаёқ "Атлетико" ҳисобни очиши мумкин эди. Вараннинг қўпол хатосидан кейин Анхель Корреа "Қироллик клуби" дарвозабони билан юзма-юз вазиятга чиқди ҳамда аниқ зарба бера олмади — тўп устун ёнидан ўтиб кетди.

Зидан шогирдлари ўйин назоратини ўз томонларига оғдира бошлашди ҳамда орадан ярим соатлар ўтиб улар яхши комбинация ташкил қилишди. Кроос ва Роналду "девор" услубида ўйнашганидан кейин немис футболчиси рақиб жарима майдончаси ичида бирга-бир вазиятга зарба берди. Тўп шундоққина устун ёнидан ўтиб кетди.

Иккинчи бўлим мутлақо тенгма-тенг курашлар остида кечди. Симеоне шогирдлари тўпни назорат қилишда ҳамда мудофаада анча ишончли ҳаракат қилишди. Ўйин сўнгида жамоалардан бири ғалабани ўз томонларига оғдиришлари мумкин эди. 79-дақиқада Гамейро яккама-якка вазиятда тўпни Касильянинг устидан оширди. Бўш дарвозага кираётган тўпни Варан бош билан юқорига уриб юборди.

Ўйин тугашига 1 дақиқа қолганида Роналду "Реал"га ғалаба келтирувчи гол муаллифига айланиши мумкин эди. Қарши ҳужум пайтида Марселонинг узатмасидан кейин Криштиану рақиб жарима майдончасида очилди ва кучли зарба беришга қарор қилди. Аммо ҳимоячи Эрнандес жон ҳолатда зарба йўлига ташланди ва муқаррар голдан жамоасини қутқарди.

Хуллас, шундай ўйин бўлдики, битта гол урган жамоа ғалабани илиб кетиши мумкин эди. Аммо ҳар иккала жамоа дарвоза дахлсизлигини сақлаб қолди. Натижада иккала жамоа 2 очко йўқотишга мажбур бўлди. Энди "Атлетико" ҳам, "Реал" ҳам пешқадам "Барселона"дан 10 очко ортда қолмоқда. Битта ўйин кам ўтказган "Валенсия" бу жамоаларни 3 очкога ортда қолдирмоқда.

Испания Ла лигаси, 12-тур
Атлетико – Реал Мадрид 0:0 (0:0, 0:0)
Атлетико – Облак, Савич, Люка Эрнандес, Хуанфран, Годин, Сауль, Габи, Коке, Парти (Феррейра Карраско, 54), Корреа (Гамейро, 77), Гризманн (Торрес, 76).
Реал Мадрид – Касилья, Варан, Марсело, Карвахаль, Рамос (Начо, 46), Модрич, Каземиро, Иско, Кроос, Бензема (Асенсио, 76), Роналду.
Огоҳлантиришлар: Карвахаль (20), Савич (34), Сауль (63), Коке (70), Хуанфран (77), Люка Эрнандес (82), Начо (82), Годин (89).