Мақсад ва интилишлар ҳозир ҳам муштарак. Бироқ истаймизми-йўқми, вақт ўз ҳунарини кўрсатади. Футболда ҳам, майдондан ташқарида ҳам жуда кўп ўзгаришлар бўлди…
Беозоргина кўринган Лионел Месси ушбу мавсумда қанчадан қанча жамоаларнинг таъзирини бермади дейсиз. У тўп билан ҳужумга ошиққан пайтда дарвозабонлардан тортиб рақиб жамоа мураббийларигача «юрак ҳовучлаб» туриши ҳеч кимга сир эмас. Эътиборингизга «ўзга сайёралик» деб аташга одатланиб қолган аргентиналик тирик афсона Лионел Месси билан уюштирилган эксклузив интервьюни ҳавола этамиз.
— Оиланинг ҳаётингиздаги таъсири қандай бўлди? Антонелла билан турмуш қуриш, фарзандларнинг дунёга келиши… Буларнинг бари ҳаётингизда қандай ўрин эгаллайди?
— Ҳамма нарса тубдан ўзгарди. Атрофга бошқача нигоҳ билан қарайдиган бўлдим. Тан олишим керак — оталик бахти ҳаётимдаги энг унутилмас воқеа бўлди. Иккита болани эркалаш ва яна учинчисини кутиш — буни сўз билан таърифлаб бўлмайди. Биринчи ўғлим туғилганда нақ еттинчи осмонда учиб юргандим. Бу туйғу бошқа ҳеч қачон такрорланмаса керак деб ўйлагандим. Йўқ, иккинчи ўғлимнинг туғилиши менга яна ўша бахтни тақдим қилди. Учинчиси дунёга келганда хурсандчилигим бундан кам бўлмаслигига ишончим комил.
— Болаларингиз билан вақтингизни қай тарзда ўтказасиз? Яқинда пайдо бўлган суратларнинг бирида Тьягога китоб ўқиётганлигингиз тасвирланган…
— Кундалик ҳаётимнинг асосий қисми фарзандларимга бағишланган. Эрталаб тўнғичим Тьягони мактабга олиб бораман, машғулотлардан қайтаётганимда эса унинг дарслари тугаган бўлади. Шундан кейин кечгача Антонелла, кичик ўғлим Матео ва Тьяго бирга бўламиз. Бир қарашда, ҳаммаси оддий оилалардагидек.
— Болаларингиз сиз билан футбол ўйнашни жуда ёқтирса керак?
— Жуда тез-тез эмас, лекин баъзида ҳовлида тўп ортидан югурган пайтларимиз бўлади. Ҳатто кичкинтой Матео ҳам биздан қолишмайди. Тьяго аллақачон футбол машғулотларига қатнишишни бошлади, лекин уйда бу масалада унча хархаша қилмайди.
— Матеога пас берганингизда у ўнг оёқ билан жавоб қайтарадими, чапи биланми?
— Ўнг оёқ билан. Ўғилларимнинг иккаласи ҳам ўнақай.
— Уйга қайтганингизда Антонелла ва болаларингиз билан футбол ҳақида гаплашасизми? Ёки барчасини остонанинг нариги томонида қолдириб кирасизми?
— Уйда футбол мавзусини деярли муҳокама қилмаймиз. Уйда футбол мавзуси кўтарилиши учун клубда ёки термада жуда ҳам муҳим воқеа содир бўлиши керак.
— Болаларингиз билан нима ҳақида суҳбатлашасиз? Уларнинг тасаввурида Лео Месси ким?
— Матеонинг бу ҳақида деярли тасаввури йўқ. Мендан дастхат ёки суратга тушишимни сўрашса, у жуда таажжубланади. Тьягониниг эса сал-пал тасаввури бор. Отаси кимлигини озгина бўлса-да, англайди. Стадионга бориб, ўйинларни томоша қилишни яхши кўради. Атрофдагилардан эшитгани учун менга “Лео Месси” деб гапиради, лекин гап нимадалигини тўлиқ тушунмаса керак.
— Келажакдаги режаларингиз қандай? Мураббийлик қилмоқчимисиз ёки…?
—Футболчи сифатидаги карьерам якунлангач нима қилишим ҳақида оила даврасида кўп маротаба гаплашганмиз. Лекин бир қарорга келганим йўқ.Ўзимни мураббий сифатида тасаввур қила олмайман, бунда менга хоҳиш ҳам йўқ. Балки бир кун келиб , фикрим ўзгарар. Хуллас, футболда ҳали анча-мунча вақтим борлиги сабабли бу ҳақида ўйлашга эрта деб ҳисоблайман.
Саралаш турнирларидан ўтиш қийинлашмоқда
—Тўртта “Олтин бутси” жавонингизда тап-тайёр. Уларга тикилиб, хаёлинигиздан нималар ўтади?
— Улар мени илҳомлантиришини тан оламан. Лекин ҳеч қачон фақат ўзимга берилган мукофотларни алоҳида фахр ҳисобламайман. Яна бир маротаба Чемпионлар лигаси ва Ла Лигада ғалаба қозонишимизни истардим. Жамоавий ғалабанинг ўрни бошқача. Бироқ бу бутсиларнинг аҳамиятини ҳам камайтирмайди.
— ЖЧ-2018 саралаш босқичида Аргентина тўқнаш келган қийинчиликлар ҳақида қандай фикрдасиз? Терма жамоа янада рақобатбардош бўлиши ва олтинга бемалол даъво қила олиши учун нималар қилиш керак?
— Ҳа, ушбу саралаш ўйинлари биз учун осон кечмади. Терма жамоани турли қарашларга эга бўлган уч нафар мураббий бошқарди. Уларнинг ҳар бирига мослашиш ва шу ўринда ўз ўйин фалсафамизни сақлаб қолиш қийин бўлди. Хорхе Сампаоли мураббийларнинг сўнггиси бўлди, у билан саралашдаги тўртта ўйинни ва бир неча ўртоқлик баҳсларини ўтказдик. Кундан-кунга жамоалар мустаҳкамланиб боряпти, саралаш ўйинлари ҳам шунга мос равишда қийинлашяпти.
— ЖЧ-2014 финал босқичида немислар Аргентинани мағлуб этишган эди. Россияда бўлиб ўтадиган чемпионатда ҳам Германияни асосий рақиб сифатида кўрасизми? Ёки Испания ва Португалия кабилар ҳам сизларни доғда қолдириши мумкинми?
— Ҳар доимгидек, Германия пешқадамлар орасида бўлади. Лекин биринчиликкка даъво қилишга ҳақли бўлган бошқа терма жамоалар ҳам бор. Масалан, Франция, Бразилия, Испания… Ҳозирги кеча-кундузда улар ажойиб ўйин кўрсатишяпти, Россияда бундан-да кучли бўлишларига шубҳа йўқ.
— 2014 йилда Бразилиядаги чемпионатда ярим финалда голландлар билан тўқнашган эдингиз. Роббен сингари юлдузли ўйинчилари бўла туриб, Голландия термасининг ЖЧ—2018 да иштирок этмаслигига қандай қарайсиз?
— Боя айтиб ўтганимдек, саралаш ўйинларидан ўтиш барча терма жамоалар учун қийинлашиб бормоқда — хоҳ у Жанубий Африка бўлсин, хоҳ Европа. Жамоалар оарсидаги фарқ шунчалар камайиб боряптики, одмигина туюлган терма ҳам сени оёғингдан чалиб йиқитиши мумкин. Навбатдаги чемпионатга Италия, Голландия келмайди… Буларнинг ҳар иккаласи ҳам узоқ йиллар давомида коинотнинг энг асосий ва аҳамиятли турнирларида иштирок этиб, бутун дунёни лол қолдирган. Менимча, уларнинг саралашдан ўта олмагани барча учун кутилмаган ҳол бўлди.
— Италия терма жамоаси ҳақида қандай фикрдасиз? Италия футболининг муаммоси нимада?
— Ҳар ҳолда, Италия футболи ўзининг аввалги шаштини йўқотганини инкор этиб бўлмайди. Жаҳон чемпионатига чиқа олмаганларига алоқаси йўқкуя, лекин Италия футболи илгаригидек эмас. А сериясига мансуб “Интер”, “Милан” каби жамоалар сўнгги ўн йилликда ўзи яратган номга муносиб ўйин кўрсата олмаяпти. Бу эса Италия футболига таъсир кўрсатмасдан қолмайди. Аммо у энди “ҳушига келяпти”, аввалги ҳолатини тиклаб олишга ҳаракат қиляпти. Умид қиламанки, Италия клублари эртами-кечми яна кучлилар қаторидан жой олади.
— Туркиялик Ардан Туран ҳозир кўпчиликнинг диққат марказида. Сиз футболчи сифатида унга қандай қарайсиз?
— Арданнинг маҳоратига гап бўлиши мумкин эмас. Унга шунчаки омад кулиб боқмади холос — мураббийнинг ишончини оқлай олмади, ўзини кўрсатиш учун унга етарлича вақт беришмади. У Мадриднинг “Атлетико”сида бўлганида ҳар якшанбада майдонга тушарди. Ора-чорада ўйинга тушиш ва ҳар бир баҳсда иштирок этиш умуман бошқа-бошқа нарса. Захирада ўйнаш осон эмас, шунинг учун у ўз иқтидорини тўла намойиш эта олмади.
