Ливиялик сиёсий ва ҳарбий раҳбар Муаммар Каддафи ўтган йилликда «Манчестер Юнайтед»ни сотиб олиши мумкин эди. Бу ҳақда The Sunday Times нашри хабар тарқатди.

Молиячи Меҳмет Далман нашрга берган маълумотига кўра, 2004 йилда у самолёт орқали Ливияга учиб борган. Далман ўшанда Каддафининг маслаҳатчиси билан учрашган ва «Манчестер Юнайтед»нинг 29,9 фоиз акцияларини сотиб олиш масаласини муҳокама қилган.

Музокарлар вақтида гап ўшанда Жон Маньера ва Жей Пи Макманусга тегишли бўлган акцияларни харид қилиш ҳақида борган. Ўша вақтда уларнинг «Манчестер Юнайтед»даги улуши энг кўп миқдорда бўлган ва назорат пакети уларда қолган.

«Одамлар ливиялик диктатор клубни сотиб олишга қанчалик яқин келганини тасаввур қила олишмайди. Қаззофий деярли клубни сотиб олиб бўлганди. Савдо амалга ошишига жуда яқин қолганди. Гап қандайдир соатлар ҳақида кетмоқда», – деган Далман.

29,9 фоиз улушни охир-оқибатда Глэйзерлар оиласи сотиб олган. Муаммар Каддафи эса 2011 йилда Ливиядаги урушлар давомида вафот этган.