Испания Ла лигасининг 22-тури доирасида "Леванте" клуби ўз майдонида "Реал"ни қабул қилди. Эътиборли томони, биринчи давра бўлгани каби мадридликлар бу сафар ҳам рақибни мағлуб эта олишмади.

Барчаси Зидан жамоаси учун омадли бошланди. Баҳснинг 11-дақиқасида Серхио Рамос "Леванте" дарвозасини ишғол қилди. Аммо биринчи бўлимга тугашига 3 дақиқа қолганида Эммануэль Боатенг ҳисобни тенглаштиришга муваффақ бўлди.

Иккинчи бўлимда "Реал" тўлиқ устунликка эга бўлди. "Қироллик клуби" футболчилари (Роналду, Бензема, Рамос) 3та жуда қулай вазиятлардан фойдалана олишмади. Шунга қарамай, ўйин тугашига 8 дақиқа қолганида Иско ўз имкониятидан фойдаланиб, жамоасини ҳисобда олдинга олиб чиқди.

Аммо мадридликларни ғалабани ушлаб қола олмадилар. Дастлаб Рохер 2-3 метр масофадан бош билан дарвозага аниқ зарба бера олмаган бўлса, учрашувнинг асосий вақти тугашига 1 дақиқа қолганида Паццини бирга-бир вазиятда Навасни доғда қолдира олди.

Шу тариқа, "Реал"нинг пешқадам "Барселона"дан ортда қолиши 21 очкога етиши мумкин.

Испания Ла лигаси, 22-тур
Леванте – Реал Мадрид 2:2 (1:1, 1:1)
Голлар: 0:1 – 11 Рамос, 1:1 – 42 Боатенг, 1:2 – 81 Иско, 2:2 – 89 Паццини.
Леванте – Оласабаль, Постиго, Луна, Коке, Робер, Лукич, Лерма (Марти, 68), Дукуре, Моралес, Иви Лопес (Паццини, 77), Боатенг (Жейсон, 60).
Реал Мадрид – Навас, Варан, Марсело, Карвахаль, Рамос, Модрич, Каземиро, Кроос (Васкес, 90), Бэйл (Иско, 66), Роналду (Асенсио, 82), Бензема.
Огоҳлантиришлар: Дукуре (13), Рамос (21), Иви Лопес (26), Асенсио (84), Коке (88), Варан (90).