“Металлург” ПФК президенти, “Ўзбекистон” металлургия комбинати Ҳиссадорлик жамияти Бош директори А.Хурсановнинг кўп миллатли Бекобод шаҳри аҳолиси номидан Ўзбекистон футбол ассоциацияси биринчи вице-президенти У.Аҳмаджонов номига ёзилган расмий хатига биноан миллий чемпионат Суперлигасининг “Металлург” – “Навбаҳор” учрашуви олдиндан белгиланган 2 март санасидан 4 март санасига кўчирилди.
Шу сабаб, “Sport” TV дастурларида ўзгариш қилишга мажбур бўлди. Суперлига ўйинларини жонли эфирда намойиш қилишни мақсад қилган “Sport” TV режага кўра 2 март, жума куни соат – 18:00 “Металлург” – “Навбаҳор” баҳсини жонли эфирда намойиш этишни режалаштирганди. Эндиликда мазкур ўйиндан репортаж 4 март, якшанба куни соат – 15:20 да бошланади.
