Суперлиганинг 2-тур доирасидаги “Насаф” – “Бухоро” 3:1 учрашувидан кейин матбуот анжумани ташкил этилди. Матбуот анжуманининг дастлабки қисмида меҳмонлар устози Улуғбек Бақоев иштирок этди.
Улуғбек Бақоев: “Насаф”ни бугунги ғалаба билан табриклайман. Учрашув қизиқарли ва мухлисларбоп бўлди. Ҳар иккала жамоада гол уриш учун кўплаб имкониятлар бўлди. Аммо яратилган вазиятлардан кўпроқ майдон эгалари фойдаланишди. Биз имкониятлардан фойдалана олмадик. Йигитларга эътирозим йўқ, улар бугун яхши ўйин кўрсатишди.
Футбол хатолардан ҳоли эмас, шунинг учун ким кам хато қилса, ғалабага эришади. “Насаф”нинг дарвозабони ҳам мамлакатимизнинг кучли дарвозабонларидан ҳисобланади. Унинг ҳам бугун ўз жамоасининг ғалабасига қўшган ҳиссаси катта бўлди. Ўйинда гол уриш керак, акс ҳолда ғалаба қозониб бўлмайди.
