Матбуот анжуманининг навбатдаги қисмида "Насаф" устози Рўзиқул Бердиев ва учрашувнинг энг яхши ўйинчиси Азизжон Ғаниев иштирок этишди.

Рўзиқул Бердиев: - Бугунги учрашув назоратимиз остида ўтказдик. Аммо ҳимоядаги битта хато орқали очко йўқотишимизга олиб келди. Тажрибали ҳимоячиларимиз бундай қўпол хатога йўл қўймаслиги керак эди. Албатта футболчиларимизга эътирозим йўқ. Аммо очко йўқотганимиз аламли бўлди. Умуман олганда, йигитларимиз ёмон ўйнашмади. Энди олдимизда турган муҳим ўйинга тайёргарликни бошлаймиз.

Азизжон Ғаниев: - Биз бу ўйинга астойдил тайёргарлик кўрган эдик. Бундай натижага лойиқ ўйин кўрсатмадик деб, ҳисоблайман. Аммо, афсуски, тайёр ғалабани қўлдан чиқардик. Шуниси аламли бўлди.

Рўзиқул Бердиев: - Черан ҳали ўйинга тўлиқ тайёр эмаслиги учун бугун уни майдонга туширмадик. У фақат кеча сафимизга қўшилди. Бу ўйинчимиз бизга жуда керак бўлаяпти. Ўйлайманки, у навбатдаги ўйинимизда бизга ёрдам бера олади. Албатта “Персеполис” билан бўладиган ўйин ҳақида ўйласликни иложи йўқ. Аммо бугунги танланган таркиб ёки олиб борилган ўйин, навбатдаги ўйинни ўйлаб қилинган эмас. Барча ўйинлар биз учун муҳим. Бобур Абдухолиқовни дастлабки дақиқалардан майдонга туширмаганимизга сабаб, бу футболчимиз кейинги вақтда умуман дам олмасдан майдонга тушмоқда. Шунингдек, бошқа ўйинчиларимизда ҳам шу ҳолат, хоҳлаймизми йўқми бундай кетма-кет ўйинлар барибир футболчиларни толиқтириб қўяди. Аммо биз кейинги ўйинга яхши тайёрланамиз, мухлисларимиз биздан ижобий натижа кутишаяпти. Биз уларни хурсанд қилиш учун майдонга тушамиз.