Англия премьер-лигасида чемпионликни расмийлаштириш арафасида турган "Манчестер Сити" учун Европа чемпионлар лигасининг чорак финал босқичидаги дастлабки ўйин муваффақиятсиз якунланди. Гвардиола шогирдлари "Ливерпуль" меҳмони бўлиб, йирик ҳисобда имкониятни бой беришди.

Клопп шогирдлари баҳснинг дастлабки ярим соатини жуда тажовузкор ўтказишди ҳамда рақиб дарвозасини 3 марта ишғол қилишди. Ўйиннинг 12-дақиқасида мерсисайдликлар тезкор қарши ҳужум ташкил қилишди. Фирмино йўллаган зарбанги Эдерсон қайтарди, аммо қайтган тўпни Салоҳ дарвозага жойлаб қўйди.

Орадан 9 дақиқа ўтиб Окслейд-Чемберлен олис масофадан кучли зарба билан ҳисобдаги фарқни оширди. Учрашувнинг 31-дақиқасида Салоҳ юқоридан етказган узатмага Садьо Мане бош билан зарба берди ва ҳисобни йирик кўринишга келтириб қўйди.

Қолган дақиқаларда "шаҳарликлар" тўпга эгалик қилишди, позицион ҳужумлар ташкил қилишди. Аммо бутун жамоа бўлиб ҳимояланган "Ливерпуль" ўз дарвозаси дахлсизлигини сақлаб қолди.

Европа чемпионлар лигасида ғолибликка даъвогар сифатида қаралаётган "Манчестер Сити" ярим финалга чиқа олмаслиги мумкин. Тўқнашув тақдири 10 март куни Манчестер шаҳрида ўтадиган жавоб баҳсида ҳал бўлади.

Европа чемпионлар лигаси, чорак финал, дастлабки ўйин
"ЛИВЕРПУЛЬ" - "МАНЧЕСТЕР СИТИ" 3:0 (3:0)
Голлар: 1:0 – 12 Салах, 2:0 – 20 Окслейд-Чемберлен, 3:0 – 31 Мане.
Ливерпуль – Кариус, Ловрен, Робертсон, Александер-Арнолд, ван Дейк, Фирмино (Соланке, 71), Окслейд-Чемберлен (Морено, 85), Салах (Вейналдум, 53), Милнер, Мане, Хендерсон.
Манчестер Сити – Эдерсон, Отаменди, Компани, Лапорт, Уокер, де Брюйне, Гюндоган (Стерлинг, 57), Сильва, Фернандиньо, Сане, Габриэл Жезус.
Огоҳлантиришлар: Отаменди (45), Габриэл Жезус (76), де Брюйне (80), Хендерсон (86), Стерлинг (90).