Турнинг марказий ўйинлардан бири сифатида эътироф этилган мазкур учрашувга бўлган қизиқиш жуда юқори эди.
“Насаф” шу кунга қадар мағлубиятга учрамаган ягона жамоа бўлиб келаётган бўлса, “Қўқон-1912” ўз майдонидаги биринчи ўйинда ғалаба қозонганди. Ўйиндан олдин “Марказий” стадионига йиғилган мухлислар учун концерт дастури тақдим этилди. Халқимизнинг севимли хонандалари - Улуғбек Раҳматуллаев ва Шаҳзода мухлисларни ўзларининг қўшиқлари билан хурсанд этишди.
Учрашув мезбонларнинг фаоллиги билан бошланди. 11-дақиқада жарима зарбасига эга бўлган, “Қўқон-1912”да гол уриш учун қулай имконият бўлган эди. “Насаф” ҳимоячиси эпчиллик қилган ҳолда хавфни бартараф этди.
14-дақиқада қанотдан ошириб берган тўпни Суҳроб Бердиев боши билан дарвозага йўллади. Зарабага бироз аниқлик етишмади.
21-дақиқада Бердиевнинг чалқанча услубда берган зарбаси мухлисларнинг олқишларига сазовор бўлди. Бироқ зарбага аниқлик етишмади. Биринчи бўлимнинг қолган дақиқаларида ҳар икки жамоа вакиллари бир қатор вазиятларга эга бўлишди. Аммо ўйиннинг биринчи қисмида дарвозалар дахлсизлиги сақланиб қолинди.
Иккинчи тайм тенг курашлар остида бошланди. Дастлабки дақиқалардан меҳмонлар ташаббусни ўз қўлларига олишга ҳаракат қилишди. Вақт ўтиши билан эса устунлик секин-аста яна “Қўқон-1912” томонига ўта бошлади. Ана шундай ҳужумларнинг бирида Қувондиқ Рўзиевнинг зарбаси бироз ноаниқ бўлди.
72-дақиқада ҳужумларни кескинлантириш мақсадида Носир Отақўзиев майдонга туширилди. Шундан кейин мезбонларнинг ҳужумлари шиддатли кўриниш ола бошлади. Аммо ҳужумларнинг якуни самарасиз якунланаверди.
85-дақиқада Дарко Гожкович жароҳат олиб майдонни тарк этди. 87-дақиқада меҳмонлар ҳисобни очишлари мумкин эди. Юсуповнинг қўлига теккан тўп дарвоза устунига тегиб майдонга қайтди.
Шу тариқа, Қўқондаги ўйинда нурсиз дуранг қайд этилди. “Қўқон-1912”нинг тўплаган очкоси эса 9 тага етди. “Насаф”нинг очколари бугунги дурангдан сўнг 13 тага етди ва 4-ўринни сақлаб қолди.
Суперлига, 7-тур.
“Қўқон-1912” – “Насаф” 0:0.
“Қўқон-1912”: 1. Ўткир Юсупов, 5. Ғиёс Комилов, 7. Жамшид Ҳасанов (96. Муҳаммаданас Ҳасанов-82), 10. Жавоҳир Сидиқов, 17. Қувондиқ Рўзиев, 18. Баҳодир Пардаев (9. Носир Отақўзиев-72), 19.Суҳроб Бердиев, 22. Мурод Холмуҳаммедов, 23. Александр Мерзляков, 55. Дарко Гожкович (95. Милан Спремо-86), 65. Марко Милич.
“Насаф”: 35. Санжар Қувватов, 4. Мақсуд Каримов, 6. Азиз Ғаниев, 7. Одил Ҳамробеков, 10. Бобур Абдухолиқов, 22. Игорь Голбан, 27. Ислом Рашидхонов (20. Ислом Кенжабоев-78), 31. Сайдулло Раҳматов, 55. Славко Лукич, 77. Жасур Ҳасанов, 92. Умар Эшмуродов.
