Европа Чемпионлар Лигасининг финалида «Реал»га қарши кечган ўйиннинг 31-дақиқасида елкасидаги жароҳат саба майдонни тарк этган «Ливерпуль» ҳужумчиси Муҳаммад Салоҳ Жаҳон Чемпионатига бора олади.
Аввалроқ Салоҳнинг жароҳати жиддийлиги ва шу боисдан Россиядаги мундиални ўтказиб юбориши ҳақида хабарлар берилганди.
Миср Спорт вазири Холид Абдулазиз Facebook’даги расмий саҳифасида Салоҳнинг жароҳатдан тикланиши учун 2 ҳафта керак бўлишини маълум қилди.
Таъкидланишича, Салоҳга ўнг елкасидаги бўғимларда шикастланиш ташхиси қўйилган. Айни дамда Салоҳ шифохонада, у бу ерда даволанишнинг биринчи босқичини ўтказади, 2 ҳафтадан сўнг терма жамоага қўшилади. Вазирнинг сўзларига кўра ҳужумчи билан рўй берган ҳолат терма жамоанинг Жаҳон Чемпионати учун берган якуний таркибига таъсир кўрсатмайди.
Маълумот учун Миср терма жамоаси Россияда ўтадиган Жаҳон Чемпионатининг А гуруҳида мезбон Россия термаси, шунингдек, Уругвай ва Саудия Арабистони терма жамоаларига қарши баҳс олиб боради.
