Россияда бўлиб ўтаёган жаҳон чемпионатининг кеча бўлиб ўтган чорак финал баҳсларида Франция Уругвайни, Бельгия эса Бразилияни турнирдан чиқариб юборди.

Бугун, 7 июль куни яна икки ярим финалчи номи аниқ бўлади.

Куннинг дастлабки ўйинида Швеция ва Англия терма жамоалари ўртасида кечади. Аксарият мухлислар бу баҳсда инглизларнинг имкониятини юқори баҳоламоқда. Албатта, Англиянинг таркиби ҳозир жуда ҳам кучли. Ҳужумчи Кейн мундиал тўпурари бўлиб турибди. У яна гол урса, Англия рекордини янгилайди.

Аммо... Биласизми, Швеция терма жамоаси инглизлар учун доим ноқулай рақиб бўлиб келган. Расмий ўйинларда (8 баҳс) Англия терма жамоаси фақат бир мартагина (Евро-2012) шведлар устидан ғалаба қозонишга эришган. Шунинг учун бугунги баҳсда Швецияни осонгина ҳисобдан чиқариб бўлмайди. Қолаверса, бу икки жамоа ҳам анча йиллардан бери ЖЧ ярим финалига чиқа олмаган. Бугун улар шу босқичдан бир қадам берида туришибди. Кураш шунга яраша бўлади.

Тахминий таркиблар:

Швеция: Ульсен – Крафт, Линделеф, Гранквист, Аугустинсон – Клаессон, Ларссон, Экдаль, Форсберг – Тойвонен, Берг

Англия: Пикфорд – Уокер, Стоунз, Магуайр – Трипье, Алли, Хендерсон, Лингард, Роуз – Кейн, Стерлинг

Учрашувни нидерландиялик Бёрн Куйперс бошчилигидаги ҳакамлар гуруҳи бошқариб боради.

Чорак финалнинг сўнгги ўйини Россия ва Хорватия терма жамоалари ўртасида бўлиб ўтади. Хорватия нафақат ушбу ўйинда фаворит, умуман турнир финалтгача чиқишга асосий даъвогар жамоа. Лекин Россия терма жамоаси мухлисларини қувонтирадиган бир анъана бор — Хорватия мусобақа мезбонларига қарши ўйинларда муваффақият қозона олмаган. 1998 йили Франция, 2014 йили Бразилия термаларига мағлуб бўлган.

Тахминий таркиблар:

Россия: Акинфеев – Фернандес, Кутепов, гнашевич, Кудряшев – Газинский, Зобнин – Самедов, Головин, Черышев — Дзюба

Хорватия: Субашич – Врсалько, Ловрен, Вида, Пиварич – Модрич, Брозович, Ракитич – Ребич, Манджукич, Перишич

Учрашувни бразилиялик Сандро Риччи бошчилигидаги ҳакамлар бригадаси бошқаради.

7 июль, шанба

Швеция — Англия 19:00

Россия — Хорватия 23:00