Суперлига 18-тури доирасидаги «Бунёдкор» ҳамда «Навбаҳор» жамоалари ўртасидаги баҳс ўз поёнига етди.

Қизиқарли учрашувда 2:1 ҳисобида мезбонларнинг қўли баланд келди. Ўйинни «лочинлар» жуда фаол тарзда бошлаб, мезбонлар дарвозаси олдида қатор вазиятлар яратишди. «Бунёдкор» ҳам бўш келмаган ҳолда ўз ҳамлалари билан жавоб қайтариб турди.

30-дақиқага келиб, Рўзим Аҳмедов ҳисобни очишга муваффақ бўлди, аммо наманганликларнинг хурсандчилиги кўпка чўзилмади. Аниқроғи, 36-дақиқада Дилшод Аҳмадалиевнинг берган зарбаси рекашет натижасида «Навбаҳор» дарвозасидан жой олди.

Шу тариқа, биринчи бўлим 1:1 ҳисобида якунига етди.

Иккинчи бўлим ҳам шиддатли тарзда бошланди. 58-дақиқада «Бунёдкор» қарши ҳужумга ўтиб кетди ва Жавлон Иброҳимовнинг пасидан сўнг Филип Райевац дарвозабон билан яккама-якка чиқиб борди ҳамда Акбар Тўраевнинг устидан тўпни ошириб дарвозани ишғол қилди.

Мазкур голдан сўнг наманганликлар ҳар қанча уринишмасин ҳисобни тенглаштира олмадилар ва учрашув 2:1 ҳисобида «қалдирғочлар» фойдасига ҳал бўлди.

PEPSI СУПЕРЛИГА. 18-ТУР

БУНЁДКОР – НАВБАҲОР - 2:1 (1:1)

Ҳакамлар: Вадим Агишев, Артём Калинин, Ҳусниддин Шодмонов, Аҳмаджон Эргашев. 

Голлар: Дилшод Аҳмадалиев (38), Филип Райевац (57) - Рўзим Аҳмедов (32).

Бунёдкор: Суҳроб Султонов, Рустам Ашурматов, Акрам Комилов, Анвар Ғофуров (Дилшод Жўраев, 41), Дилшод Аҳмадалиев (Мирғиёс Сулаймонов, 61), Жавлон Иброҳимов, Мурод Тошматов, Сардор Собирхўжаев, Хуршид Ғиёсов, Миржамол Қосимов (Азиз Ҳайдаров, 72), Филип Раевац.

Навбаҳор: Акбар Тўраев, Остон Ўрунов, Шерзод Каримов (Илҳом Бойдедаев, 80), Азиз Турғунбоев, Сардор Сулаймонов, Мирзоҳид Ғофуров, Аъзам Алиев, Рўзим Аҳмедов (Дарко Никач, 62), Даврон Ҳошимов, Жаҳонгир Меҳмонов, Дарко Станоевич.

Огоҳлантириш: Сардор Собирхўжаев (73).