Англия чемпионати 2-тур марказий учрашуви “Челси” ва “Арсенал” ўйни якунланди. “Стемфорд Бридж” ўйингоҳида кечган баҳсда мезбонлар иродали ғалабага эришди.

Ўйиннинг 9-дақиқасида Педро ҳисобни очган бўлса, 20-дақиқада Альваро Мората жамоасининг иккинчи голини урди.

Биринчи бўлим якунланиши арафасида меҳмонлар икки тўп фарқини йўққа чиқара олишди. 37-дақиқада Генрих Мхитарян ҳисобни қисқартирган бўлса, 41-дақиқада Алекс Ивоби мувозанатни тиклади.

Иккинчи бўлим ҳам хавфли ҳужумларга бой бўлди, бироқ рақиб дарвозасини ишғол қилиш кўкларга насиб этди. 81-дақиқада Маркос Алонсо Эден Азарнинг узатмасини голга айлантириб, жамоасига ғалаба олиб келди.

Шу тариқа, «Челси» кетма-кет иккинчи ғалабасини қўлга киритди, «Арсенал» эса аксинча 1992 йилдан кейин илк бор АПЛ стартидаги икки турда мағлуб бўлди.

Англия чемпионати, 2-тур

Челси – Арсенал 3:2

Голлар: 1:0 – 9 Педро, 2:0 – 20 Мората, 2:1 – 37 Мхитарян, 2:2 – 41 Ивоби, 3:2 – 81 Алонсо.

Челси – Аррисабалага, Рюдигер, Алонсо, Аспиликуэта, Давид Луиз, Баркли (Ковачич, 60), Жоржиньо, Виллиан (Азар, 61), Канте, Педро, Мората (Жиру, 75).

Арсенал – Чех, Папастатопулос, Монреаль, Бельерин, Мустафи, Гендузи, Жака (Торрейра, 46), Ўзил (Рэмзи, 68), Мхитарян, Ивоби (Ляказетт, 75), Обамеянг.

Огоҳлантиришлар: Жака (27), Мустафи (77).