“Бунёдкор” – “Навбаҳор” учрашувидан кейин ўтказилган матбуот анжуманида Илҳом Мўминжонов ОАВ ходимларининг саволларига жавоб қайтарди. “Навбаҳор” устози ортда қолган ҳафта мавзусига айланган футболчи Рўзимбой Аҳмедов билан содир бўлган можаро ҳақидаги саволларга ҳам жавоб қайтарди.
Хабарларга қараганда, “Бунёдкор”га қарши баҳс сизнинг “Навбаҳор”даги сўнгги ўйинингиз экан. Жамоа бошқаруви россиялик мутахассис Андрей Канчельскисга топширилар экан. Ушбу маълумот қанчалик ҳақиқатга яқин?
- Бу маълумотни энди эшитяпман. Бундан умуман хабарим йўқ. Албатта, “Навбаҳор”га бефарқ эмасман. Жамоада балки 4 йил ёки 5 йил ишларман, ёхуд умримнинг охиригача ёки кейинги ҳафта ишдан кетаманми, буни ўзим ҳам билмайман. Бунга ҳали ойдинлик киритилмади.
- Рўзимбой Аҳмедов анчадан буён асосий таркибдан жой олмаётганди. Бугунги баҳсда эса бошланғич таркибда майдонга тушди. Буни нима билан изоҳлайсиз?
- Рўзимбой Аҳмедов билан боғлиқ масала клубнинг ички сири. Буни сизларга ошкор эта олмайман. Жамоамиз ҳужумчиларидан бири бўлган Азамат Алланиёзовнинг жароҳати бор эди. У ҳозир гипсда. Қўл остимиздаги 2 нафар ҳужумчининг хизматларидан фойдаландик. Бири майдонда 65, иккинчиси эса 25 дақиқа ҳаракат қилди. Биз уларга умид боғлагандик. Афсуски, улар вазиятлардан фойдалана олишмади. Ишлашда, изланишда давом этиб, кейинги учрашувларга жиддий тайёргарлик кўрамиз.
- Рўзимбой Аҳмедов билан боғлиқ можаро бугунги ўйинга, жамоанинг ички муҳитига салбий таъсир ўтказдими?
- Менимча, салбий таъсир кўрсатмади. Бугунги баҳсда “Бунёдкор” ҳақли ғалаба қозонди. Шогирдларим профессионал ва бўлиб ўтган можаро уларга руҳий жиҳатдан таъсир ўтказмаган. Энди кейинги баҳсларга яхши тайёргарлик кўрамиз.
- “Навбаҳор” клуби сизнинг қўл остингизда Намангандаги ўйинларда мағлубиятга учрамаяпти. Аммо сафардаги учрашувларда негадир жамоанинг омади келмаяпти. Бу нима билан боғлиқ?
- Тўғри, сафардаги ўйинларда негадир омадимиз келмаяпти. Балки бунда мураббийлар штабининг ҳам айби бордир? Олдинда яна 7 тур баҳслари бор ва ўша ўйинларнинг тўрттасини сафарда ўтказамиз ва мазкур бўлажак баҳсларда очко олишга ҳаракат қиламиз. Мабодо энди сафардаги учрашувларда очко ололмасак, чемпионликка даъвогарлик қилолмаймиз.
