Ўзбекистон терма жамоаси ва Тошкентнинг «Пахтакор» клуби ярим ҳимоячиси Жалолиддин Машарипов ОФК томонидан 6 ой муддатга дисквалификация қилинди. Бу ҳақда ОФК расмий сайти хабар берди.

ОФК Тартиб-интизом қўмитаси томонидан чиқарилган қарорда қайд қилинишича, Жакартада бўлиб ўтган Осиё ўйинларининг футбол мусобақалари чорак финалида Ўзбекистон (U23) - Жанубий Корея (U23) учрашувидан кейин ўзбекистонлик футболчи ҳакамга қарата сув идишини отган. Шу боис Жалолиддин Машарипов 6 ой муддатга ўртоқлик ўйинларидан дисквалификация қилинди. Ушбу қарор 8 октябрдан бошлаб кучга кирди.

Шунингдек, футболчи ушбу муддатдан ташқари яна битта ўртоқлик ўйинида майдонга туша олмайди. Бундан ташқари, "Пахтакор" футболчиси 5 минг АҚШ доллар жаримага тортилди. Мазкур жарима 30 кун ичида тўлаб берилиши шарт қилиб қўйилган.

ОФКнинг мазкур қарори Машариповга етказилган ҳамда у огоҳлантирилган: бундай ҳолат яна такрорланса, футболчи янада жиддийроқ жазога тортилади.

Эндиликда футболчи Ўзбекистон терма жамоаси сафида апрель ойига қадар ўртоқлик ўйинларида иштирок эта олмайди. Машарипов октябрь ойида бўлиб ўтадиган КХДР ва Қатарга қарши учрашувларни ҳам ўтказиб юборади. Аммо Жалолиддин Ўзбекистон терма жамоаси сафида январь ойида БААда бўлиб ўтадиган Осиё кубоги мусобақсида иштирок этиши мумкин.