ФИФА кунларидан кейин "Реал" 2 ҳафта ичида 5та ўйин ўтказади. Мазкур ўйинлар жамоа бош мураббийи Хулен Лопетегининг тақдирини ҳал қилади.
Испаниялик мутахассис "ФИФА вируси" билан танишиб олди: Гарет Бэйл терма жамоа сафидан жароҳат билан қайтди. У ҳозирда жароҳатини даволаш учун индивидуал тарзда шуғулланмоқда. Уэльслик футболчи "Леванте"га қарши ўйинни ўтказиб юборади.
"Леванте"га қарши ўйин Тошкент вақти билан 16:00да старт олади. Шундан сўнг "Қироллик клуби" ҳафта ўртасида Плзеннинг "Виктория" клубига қарши Европа чемпионлар лигасининг 3-тур баҳсини ўтказади. Табиийки, "Мадрид" мухлислари бу ўйинларда нафақат ғалабани, балки сифатли ўйинни ҳам кутишмоқда.
28 октябрь куни эса "Реал"ни "Камп Ноу"да "Барселона" кутиб олади. Кўпчилик мана шу баҳс Лопетегининг тақдирини ҳал қилишини тахмин қилмоқда. Агар "кўк-анорранглилар" азалий рақибини яққол устунлик билан мағлуб этса, Флорентино Перес мураббий орасида ўйлаб қўйган захира режасини амалга оширишига тўғри келади.
Мадридликлар "эл-класико"да ижобий натижа қайд эта олишмаса, Испания кубоги доирасида бўладиган ўйинни жамоа янги мураббий қўлостида ўтказиши мумкин. Бу босқичда "қаймоқранглилар"га қуйи дивизион жамоаларидан бири рақиб бўлади. Рақиб номи эртага ташланадиган қуръадан сўнг аниқ бўлади. Кубок баҳсида Лопетеги таркиб борасида бемалол ротацияни амалга ошириши мумкин.
Ноябрь ойи бошида "Реал" ўз майдонида Роналдонинг "Вальдолид" жамоасига қарши баҳс олиб боради.
Мана шу ўйинлардан кейин "Реал" президенти бир қарорга келади: Лопетеги ўз ишини давом эттиради ёки истеъфога чиқарилади.
"Реал Мадрид"нинг навбатдаги 5та ўйини:
20 октябрь. "Реал" - "Леванте" (Ла лига, 9-тур)
23 октябрь. "Реал" - "Виктория" (ЕЧЛ, 3-тур)
28 октябрь. "Барселона" - "Реал" (Ла лига, 10-тур)
31 октябрь. Испания кубоги баҳси
3 ноябрь. "Реал" - "Вальядолид" (Ла лига, 11-тур)
