Хабарингиз бор, бугун Суперлиганинг 26-тури доирасида Наманганнинг “Навбаҳор” клуби ўз майдонида Бухоронинг “Бухоро” жамоасини қабул қилади.

Мазкур ўйин олдидан ҳар икки жамоа мутасаддилари, шунингдек, учрашув комиссари Бобур Ҳайдаров иштирокида митинг ўтказилди. Унда бўлажак баҳсга оид бир қатор масалалар муҳокама қилинди.

Шунингдек, жамоаларнинг бугунги учрашувда қандай рангдаги либосларда майдонга тушишлари ҳам маълум бўлди. Унга кўра, бўлажак баҳсда “Навбаҳор” футболчилари қизил, “Бухоро” вакиллари эса кўк рангли футболкаларда  майдонга тушадиган бўлишди.

Эслатиб ўтамиз, “Навбаҳор” – “Бухоро” учрашуви  “Марказий” ўйингоҳда бугун соат 16:00да бошланади.

Бўлажак баҳс шунингдек, россиялик мутахассис Андрей Канчельскиснинг “Навбаҳор” бош мураббийи сифатидаги дебют учрашуви ҳисобланади.

“Навбаҳор” ПФК матбуот хизмати.