Туркманистон пойтахти Ашхобод шаҳрида оғир атлетика бўйича бўлиб ўтадиган жаҳон чемпионатида бир қатор рекорд натижалар қайд этилиши кутилмоқда. Ўтган галги мусобақаларга қараганда бу сафарги жаҳон чемпионатида иштирокчи давлатлар ва қатнашувчи спортчилар сони рекорд даражада (яъни 91 та давлатдан 693 нафар спортчи) бўлади.

Бунга қадар энг кўп давлат вакиллари қатнашган жаҳон чемпионати Париж (87 та) ҳамда қатнашувчи спортчилар сони рекорд даражада бўлгани Грециядаги (626 нафар) мусобақаларда қайд этилган эди.

Мазкур мусобақа Япониянинг Токио шаҳрида бўлиб ўтадиган Олимпия ўйинлари учун зарурий бўлган квалификацион очколарни тақдим этади.

Эркаклар ўртасида 84-маротаба, аёллар ўртасида эса 27-маротаба ташкил этилаётган жаҳон чемпионати 1 ноябрдан 10 ноябргача бўлиб ўтади. Эркаклар -55, -61, -67, -73, -81, -89, -96, -102, -109 ва +109 кг вазн тоифаларида беллашади. Аёллар ўртасидаги баҳслар эса -45, -49, -55, -59, -64, -71, -76, -81, -87, +87 кг вазн тоифаларида ўтказилади.