Хабарингиз бор 1 ноябрь куни соат 18:00 да «Навбаҳор» жамоамиз «Пахтакор»га қарши баҳс олиб боради. Агар ушбу учрашувда «Навбаҳор» ғалаба қозонса, чемпионат янада қизғин бўлишини таъминлаб беради.
Биз эса ўз анъанамизга содиқ қолиб, мазкур тўқнашув тарихига назар соламиз. Афсуслар бўлсинки, тарих биз учун жуда ёмон ўтган. Тошкентда «Пахтакор»дан мана 20 йилдан буён узлуксиз фақат мағлуб бўлиб келяпмиз. Ўз майдонимизда «шерлар»ни анча қийин аҳволга солиб қўйганмиз, аммо сафарда аксинчасини кўриб келмоқдамиз.
Бу икки клубнинг йўллари Суперлига (олий лига)да 55 бор кесишган. Устунлик «Пахтакор» томонида. 35 та ўйинда “шерлар”нинг қўли баланд келган бўлса, 13 та учрашувда «лочинлар» ғолиб бўлишган. 7 учрашувда ғолиб аниқланмаган. Тўплар нисбати «Пахтакор» фойдасига. Тошкентликлар шу кунга қадар ўзаро ўйинларда 95 та гол киритиб ўз дарвозаларидан 33 марта тўп олиб чиқишган. Ўзаро ўинларда «Пахтакор» 112 очкони, «Навбаҳор» эса 46 очкони қўлга киритган.
«Пахтакор» олий лигада «Навбаҳор» устидан 7:0 ҳисобида ғалаба қозонган. Бу ўзаро ўйинлардаги тошкентликларнинг энг йирик ҳисобидир. «Навбаҳор»нинг ўзаро ўйинлардаги «шерлар» устидан эришган энг йирик ғалабаси эса 2:0 бўлиб турибди.
Тошкентда ўтган сўнгги беш учрашув:
2018 - «Пахтакор» – «Навбаҳор» 1:0
2017 - «Пахтакор» – «Навбаҳор» 1:0
2016 - «Пахтакор» – «Навбаҳор» 3:0
2015 - «Пахтакор» – «Навбаҳор» 1:0
2014 - «Пахтакор» – «Навбаҳор» 2:1
