Xabaringiz bor 1 noyabr kuni soat 18:00 da «Navbahor» jamoamiz «Paxtakor»ga qarshi bahs olib boradi. Agar ushbu uchrashuvda «Navbahor» g‘alaba qozonsa, chempionat yanada qizg‘in bo‘lishini ta’minlab beradi.

Biz esa o‘z an’anamizga sodiq qolib, mazkur to‘qnashuv tarixiga nazar solamiz. Afsuslar bo‘lsinki, tarix biz uchun juda yomon o‘tgan. Toshkentda «Paxtakor»dan mana 20 yildan buyon uzluksiz faqat mag‘lub bo‘lib kelyapmiz. O‘z maydonimizda «sherlar»ni ancha qiyin ahvolga solib qo‘yganmiz, ammo safarda aksinchasini ko‘rib kelmoqdamiz.

Bu ikki klubning yo‘llari Superliga (oliy liga)da 55 bor kesishgan. Ustunlik «Paxtakor» tomonida. 35 ta o‘yinda “sherlar”ning qo‘li baland kelgan bo‘lsa, 13 ta uchrashuvda «lochinlar» g‘olib bo‘lishgan. 7 uchrashuvda g‘olib aniqlanmagan. To‘plar nisbati «Paxtakor» foydasiga. Toshkentliklar shu kunga qadar o‘zaro o‘yinlarda 95 ta gol kiritib o‘z darvozalaridan 33 marta to‘p olib chiqishgan. O‘zaro o‘inlarda «Paxtakor» 112 ochkoni, «Navbahor» esa 46 ochkoni qo‘lga kiritgan.

«Paxtakor» oliy ligada «Navbahor» ustidan 7:0 hisobida g‘alaba qozongan. Bu o‘zaro o‘yinlardagi toshkentliklarning eng yirik hisobidir. «Navbahor»ning o‘zaro o‘yinlardagi «sherlar» ustidan erishgan eng yirik g‘alabasi esa 2:0 bo‘lib turibdi.

Toshkentda o‘tgan so‘nggi besh uchrashuv:

2018 - «Paxtakor» – «Navbahor» 1:0

2017 - «Paxtakor» – «Navbahor» 1:0

2016 - «Paxtakor» – «Navbahor» 3:0

2015 - «Paxtakor» – «Navbahor» 1:0

2014 - «Paxtakor» – «Navbahor» 2:1