«Манчестер Юнайтед»нинг собиқ аъзоси, айни вақтда Наманганнинг «Навбаҳор» клубини бошқараётган россиялик мутахассис Андрей Канчельскиснинг фикрлари доимо журналистларни қизиқтириб келган. Жумладан, «Спартак»нинг ёш футболчиси Михаил Игнатовни «МЮ» скаутлари кузатаётгани маълум бўлгач, Канчельскисни суҳбатга тортиш учун дарров асос пайдо бўлди.
- Хабарингиз борми, «Манчестер Юнайтед»нинг скаутлари «Рубин»га қарши ўйинда «Спартак» аъзоси Игнатовнинг ҳаракатларини кузатишибди?
- Очиғи, бу хабарни эшитдим, аммо у мени ҳайратга солмади. Менимча, бу оддий ҳолат. Зеро «МЮ» скаутлари бутун дунё кезиб, ёш, иқтидорли футболчиларни кузатишади. «МЮ»нинг нигоҳи бу гал Игнатовга қаратилгани эса яхши. Мазкур ҳолат бўйича яна нима дейишим мумкин?! Деярли ҳеч нима... Биргина ўйин - бу кўрсаткич дегани эмас. Барқарорлик эса маҳорат белгиси. Ўзингиз ўйлаб кўринг, бизнинг қанчадан-қанча ёшлар бир порлаб, кейин сўниб кетишди? Бордию ўша Игнатов мавсум охиригача барқарор ўйин намойиш қилиб берса, у ҳақда жиддийроқ бош қотирса, арзийди. Эҳтимол, уни кимдир «МЮ» селекционерларига шунчаки, тавсия қилгандир. Нима бўлгандаям, жиддий қизиқиш ҳақида гапиришга ҳали эрта. Албатта, йигитчанинг омади юришиб кетишидан умидворман, аммо...
- Нима, аммо?
- Биласизми, гранд клублар бундай ҳолатларда номзодни узоқ вақт кузатишади. Мисол учун, «Милан» ўз вақтида Шевченконинг ўйинларини нақ икки йил кузатган. Фергюсон эса мени худди шундай - узоқ вақт синаб кўрганди.
- Узоқ - бу қанча?
- Ўйлашимча, камида 8-9 ой. Умуман, деярли бир йил давомида кузатув остида бўлганман. Нима, сиз Игнатовни биргина ўйиндан кейин «МЮ»га чақиришади деб ўйлайсизми?! Йўқ, бунақаси кетмайди. Унга ўхшаганлар дунёда қанча-ю... Йўқ, мен тирноқ остидан кир қидирмаяпман. Игнатовга фақат ва фақат омад ёр бўлишини истайман. Бироқ ҳаммасини вақт кўрсатади.
- Футболчи эндигина 18 ёшга тўлди. Балки Англия ҳақида ўйлашга ҳали эртадир?
- Нега эрта бўларкан? Иттифоқ даврида 18-19 ёшли футболчилар терма жамоа сафида тўп сурарди. Сизлар эса 22га кирган кап-катта одамни «ёш футболчи» деб атайсизлар... Аслида бундай бўлмаслиги керак.
- Ахир ўзингиз ҳам айнан 22 ёшда «МЮ»га йўл олгансиз. 18да эмас...
- Ҳа, бу ҳақиқат. Шунчаки, йигитча футболчи сифатида янада ўсишини истайман, холос. Яъни у бошқаларга ўхшаб йўқолиб кетмаса, зарарли одатлардан ўзини тийса... Агар у ўз устида ишлаб, олға интилишда давом этса, ҳаммаси кутилганидек тус олиши мумкин. Дарвоқе, бу ўринда яна битта муаммо бор: ҳаётда шунақа инсонлар ҳам учрайдики, улар исталган лаҳзада оёғингдан чалиши мумкин.
- Агентларни назарда тутяпсизми?
- Агентлар ҳам, чала агентлар ҳам... Шунингдек, футболда ишингга халақит беришдан бошқани билмайдиган мураббийлар ҳам учраб туради. Хуллас, муаммолар кўп. Ҳар қандай ҳолатда ҳам йигитчанинг ўсиб-ўлғайишига умид қиламан. Уни тўғри йўлдан адаштирмасин. Бироқ яна қайтараман, Игнатовнинг биргина ўйини ҳеч нарсани ҳал қилмайди.
- Қизиқ, нима учундир Канчельскисдан кейин бирортаям россиялик «МЮ»га таклиф этилмади...
- Нима десам экан? Менимча, Иттифоқ парчалангандан кейин футбол тизими, ғоялар ва анъаналар ҳам ўзгарди. Ўтмиш бутунлай йўқолди. Шунинг учун ҳозирги футболчиларимиз жаҳон даражасига чиқа олишмаяпти. Олдингидек яхши мактаблар, жонкуяр болалар мутахассислари қолмади. Ҳозирги натижаларнинг деярли ҳаммаси сохта, ясама. Ҳаммамиз бурчак-бурчакларда туриб олиб, худди бизда ҳамма ишлар «беш»дек «урра» деб қичқирамиз-у, аслида клубларимиз бирин-кетин йўқолиб кетяпти. Уларга қўшилиб футболчилар ҳам.
- Эҳтимол, Головин «Монако»дан кейин айнан Англияга йўл олар?
- О, бундай бўлишини чин дилдан ҳоҳлардим. Лекин минг афсуски, унинг клуби айни пайтда муаммолар гирдобидан чиқа олмаяпти. Бунақа вақтда скаутлар унга эътибор қаратишадими?! Йўқ, албатта. Фикрим хато бўлиб чиқса, қанийди. Демоқчиманки, Александр янада кучлироқ клуб сафига ўтишини жуда-жуда истайман. Воқеалар ривожи шундай тус олса, хурсанд бўлардим. Бироқ кўриниб турибдики, Головин хориж футболига тўла мослашиб кетиши учун яна бироз вақт керак, чоғи.
