Хабар бериб ўтганимиздек, шу кунларда пойтахтимиз Тошкент шаҳрида дзюдо бўйича нуфузли Гран-При турнири бўлиб ўтмоқда. Мусобақада жаҳоннинг 47 мамлакатидан 350 нафарга яқин спортчи иштирок этмоқда. Бугун, 10 ноябрь куни ушбу Гран-При турнирининг тантанали очилиш маросими бўлиб ўтди.

Унда Миллий олимпия қўмитаси Бош котиби Жасур Матчанов ҳам иштирок этди. МОҚ Бош котиби сўзга чиқар экан, мусобақа юртимизда катта қизиқишга сабаб бўлаётгани ҳақида гапирди.

«Дзюдо Ўзбекистонда энг оммавий спорт турларидан бири ҳисобланади. Шундай экан, Гран-При турнири ҳамюртларимиз орасида ҳам катта қизиқишга сабаб бўлмоқда. Юртимиз бунгача бир қатор нуфузли баҳсларга мезбонлик қилган. Ишончим комилки, ушбу Гран-Прини ҳам юқори савияда ўтказа оламиз. Фурсатдан фойдаланиб, мусобақа иштирокчиларига муваффақиятлар тилайман. Турнирда энг кучлилар ғолиб бўлсин», – деди Жасур Матчанов.

Шунингдек, тадбир давомида Ўзбекистон Республикаси Жисмоний тарбия ва спорт вазири Дилмурод Набиев, Халқаро дзюдо федерацияси спорт директори Владимир Барталар сўзга чиқишди ва ўзларининг энг самимий тилакларини изҳор этдилар.

Сўнгра Ўзбекистон Республикаси давлат мадҳияси янгради ва мусобақа расман очиқ деб эълон қилинди.

Очилиш маросимидан сўнг мусобақанинг иккинчи кунидан ўрин олган финал жангларига старт берилди.