Италия термаси бош мураббийи Роберто Манчини Миллатлар лигаси доирасидаги Португалияга қарши баҳсдан сўнг (0:0) жамоанинг беш нафар футболчисига жавоб бериб юборди. Улар 20 ноябрь куни АҚШ билан бўладиган ўртоқлик баҳсида иштирок этмайди.
Football Italia`нинг ёзишича, терма жамоа базасини Жоржо Кьеллини, Алессандро Флоренци, Жоржиньо, Лоренцо Инсинье ва Чиро Иммобиле тарк этган.
«А» лигасининг 3-гуруҳида етакчи жамоа номи маълум бўлиб улгурган. 3 ўйинда 7 очко тўплаган Португалия гуруҳ ғолиби сифатида плей-оффга йўл олди. «Скуадра адзурра» эса 4 учрашувда 5 очко тўплаб, иккинчи поғонани банд этди. Сўнгги турда португаллар билан куч синашадиган Польша ҳисобида 1 очко бор.
Сешанба кунги Италия – АҚШ беллашувига Бельгиянинг Генк шаҳри мезбонлик қилади.
Қўшимча сифатида айтиш ўринли, "Ювентус" ҳимоячиси Жоржо Кьеллини учун кечаги ўйин терма жамоа сафидаги 100-учрашув бўлди.