Аввалроқ, Олимпия ўйинлари совриндори, жаҳон чемпиони Шаҳрам Ғиёсов профессионал рингдаги олтинчи жангида Мигель Замудиони биринчи раундда нокаутга учратгани ҳақида хабар берган эдик.
Шаҳрам шундан сўнг, Instagram’даги саҳифасида мухлислари ва бутун Ўзбекистон халқига раҳматнома йўллади.
Видеони Instagram’да кўриш учун бу ерга босинг
“Ассалом алайкум азиз дўстлар, табриклар учун ҳаммага катта раҳмат! Мен учун бугун ёқимли кун бўлди. Худога шукр, олтинчи жангимда ҳам рақибимни нокаут билан мағлуб этдим. Олдимизда ҳали узоқ йўл бор, ҳаммаси олдинда. Шу ўринда промоутерларимга раҳмат айтмоқчиман, мен сизларни ҳеч қачон уялтириб қўймайман. Ишонч учун миннатдорлик билдираман.
Мен барча камарларни олгунимгача, тўхтаб қолмайман. Бунда менга сизнинг қўллаб-қувватлашингиз керак бўлади. Ўзбекистон аҳлига раҳмат! Мухлислар олқишлашди, мен учун хавотирга тушишди. Бутун халқимизга, Президентимизга, ота-онамга, дўст ёр-у биродарларим, амакимга каттакон раҳмат!” дея видео мурожаат йўллаган Шаҳрам.
Шаҳрам Ғиёсов саккиз раундга мўлжалланган жангнинг биринчи раундидаёқ рақибини нокаутга учратди ва фаолиятидаги олтинчи ғалабасига эришди.
