11-декабрь, сешанба куни Европа Чемпионлар Лигасининг 4 та гуруҳида 6-тур ўйинлари бўлиб ўтади.
«А» гуруҳида деярли барча масала ҳал бўлган. Икки йўлланма эгаси аниқ — «Атлетико Мадрид» ва «Боруссия Д». Европа Лигасига эса «Брюгге» йўл олган. Бугунги ўйинлар эса фақатгина гуруҳ ғолиби номига аниқлик киритиб бериши мумкин.
«Б» гуруҳида 1-ўрин масаласини «Барселона» 13 очко билан муддатидан аввал ҳал этган. Каталонияликлар бугун 7 очкоси бор «Тоттенҳем»ни қабул қилади. «Шпорлар» кейинги босқичга чиқиши учун ғалаба қозониши талаб этилади. Боиси 7 очкога эга «Интер» ўз майдонида гуруҳ аутсайдери ПСВни меҳмон қилади.
«C» гуруҳида бугун барча йўлланмалар ўз эгасини топади. Айни дамда 6 очкога эга бўлиб турган «Ливерпул» 9 очко билан гуруҳда пешқадамлик қилаётган «Наполи» билан куч синашади. Мазкур ўйинда Клопп шогирдларини фақат ғалаба қаноатлантиради. Анчелотти шогирдларига эса дуранг ҳам кифоя қилади. 8 очко билан гуруҳда иккиннчи ўринни банд этиб турган ПСЖ сафарда «Срвена Звезда» 
меҳмони бўлади. ПСЖнинг тақдири ҳам ўз қўлида, агар Тухел шогирдлари сафарда ғалаба қозонса ҳеч қандай тўсиқсиз плей-оффга чиқади.
«Д» гуруҳидаги ўйинлар бир вақтда — 22:55 да бўлиб ўтади. Мазкур гуруҳда «Порту» биринчи ўрин масаласини, «Шалке-04» эса иккинчи ўринни ҳал этган. «Порту» сафарда «Галатасарой» меҳмони бўлади. Мезбонлар Европа Лигасига йўл олиш учун гуруҳ пешқадамини ютишга ҳаракат қилиб кўради. Худди шу ишни «Локомотив» сафарда «Шалке-04»га қарши ўйинда такрорлашга ҳаракат қилиб кўради.
