"Шанхай СИПГ"нинг бразилиялик ҳужумчиси Халк россиянинг "Зенит"ида тўп сурган даврини эслади.

"Мен Аксель Витцель билан бир вақтда "Зенит"га ўтганман. Биз иккимиз жамоага ёрдам бериш учун келгандик, ўзимизни бошқалардан устун қўймас эдик. Барчага ҳурмат билан муносабатда бўлар эдик ва жамоада яхши муҳит яратишга ҳаракат қилдик. Аммо кутилмаганда баъзи рус ўйинчилари ҳасад қила бошладилар. Мен мулоқот қилмоқчи, муносабатларни яхшиламоқчи бўлдим, аммо бу қийин эди. Голлар уравердим ва уларга эътибор бермадим. Машғулотларда мен билан деярли суҳбатлашмас эдилар.

Тахминан уч ойдан сўнг клуб президентига кетмоқчи эканимни айтдим. У эса: "Қаёққа кетасан? Ақлдан оздингми?!" деди. Менга озгина сабр қилишим, ҳаммаси жойига тушиши айтишди. Танаффусда жамоадаги муҳитни бузаётганларни ҳайдай бошлашди. Жамоа яхшигина тозаланди. Шундан сўнг кийиниш хонасидаги муҳит анча яхшиланди", - дейди Халк.