Акмал Эшонхонов

Шаржа шаҳридан махсус

Осиё Кубоги мусобақасининг 1-турида Ўзбекистон Уммон терма жамоаси устидан 2:1 ҳисобида ғалаба қозонди. Ўйиндан сўнг бўлиб ўтган матбуот анжуманда Уммон терма жамоаси мураббийи Пим Вербек журналистлар саволларига жавоб қайтарди.

“Ҳа, бугун яхши ўйнадик. Ўйиннинг биринчи бўлимида голга тортадиган иккита вазият яратдик, ўйин томонлама ҳам рақибдан устунлик қилдик. Фақат Ўзбекистон термаси жарима зарбасини голга айлантирди. Рақиб бу вазиятда омадли чиқди.

Ўйинга гап-сўз бўлиши мумкин эмас, шунчаки ажойиб ўйнадик, кўплаб ҳужумлар уюштирдик. Агар иккинчи голни ўтказмаганимизда, бу ўйин билан камида бир очко ишлашга муносиб эдик. Дастлабки ўйин бўлгани сабаба футболчиларда ҳаяжон ҳам езилди.

Энди асосий эътиборимизни келгуси ўйинларга қаратамиз. Япония ҳамда Туркманистонга қарши ўйинларда 4 очко олишимиз керак. Айтаётган режам амалга ошса, гуруҳдан чиқишимиз мумкин.

Уммон деярли барча ўйинларда қатор вазиятлар юзага келтиради. Лекин бизнинг камчилигимиз ҳужумларда охирги нуқтани қўя олмаётганимиз деб ўйлайман. Вазиятларни голга айлантириш муаммоси билан кўпроқ шуғулланамиз.

Ўзбекистон биринчи бўлимда гол ургандан сўнг тўлиқ ҳимояга ётиб олди. Умуман олганда учта имкониятдан иккита гол урди ва бу ғалаба келтирди. Биласизми, футболда энг муҳими натижа. Тўғри, Уммон чиройли ўйнади, бироқ якунда бу наф бермади. Ўзбекистон кам сонли вазиятлардан тўғри фойдаланди.