Қўшниларимиз аввалига Марчелло Липпи бошчилигидаги Хитой термаси билан тенгма - тенг ўйнаб дарвозабоннинг иккита қўпол хатоси эвазига учрашувни бой беришди. Иккинчи турда эса Осиёнинг гранд жамоаси Жанубий Корея билан мардонавор курашди.

Ўша учрашувда корейслар тажриба эвазига ғалаба қозонишди.Тан олиш керак, иккала ўйинда ҳам дебютант Қирғизистон термаси чакки кўринмади. Уларга озгина тажриба ва ўз кучига ишонч етишмади, холос. Агар, қўшниларимиз бирнчи турни Филлипин термасига қарши ўтказиб бошлашганида эди, Жанубий Корея ва Хитой термаларига янаям қийин бўлган бўлар эди. Александр Крестенин шогирдларига биринчи ўйиндаги аламли мағлубият қаттиқ таъсир ўтказди.

Хитойга қарши учрашувда Павел Матияшнинг иккита қўпол хатоси Қирғизистонни бутунлай синдириб қўйди.

Жанубий Корея билан ўйин олдидан қўшниларимиз енгил депрессия ҳолатида эдилар ва бу ҳолатдан чиқиб кета олишмади. Энди улар олдида ягона йўл қолди. 3- турда ўзларини қўлга олиб, энг сўнгги кучларини майдонга ташлаб, йирикроқ ҳисобда ғалаба қозонган ҳолда 3- ўрин орқали плай-офф га чиқиш. Тўғри, бу ғалаба билан қўшниларимизнинг плай-оффга чиқиш имконлари ўз қўлларида бўлмайди, лекин ҳаракат қилиш керак, сабаби бу улар учун сўнгги имкон!