Якунланаётган Осиё кубоги мусобақасига эътибор берган зийрак мухлисларимиз бир нарсага эътибор қаратган бўлсалар керак. Терма жамоамиз ўз тарихидаги энг одми, ва қўпол қилиб айтганда, беўхшов либосларда турнирда қатнашди. Энг ачинарлиси шундаки, бу либосларда на миллий байроғимиз, на миллий гербимиз акс этган. Футболчиларимиз бу либосларда худди «сувга тушган нон» сингари ивиб кетгандек кўринишди. Замонавий ва бежирим либос масаласи бизда бир неча йиллардан бери оғриқли муаммо эканлиги ҳеч кимга сир эмас.
Миллий байроғимизга эътибор қаратинг:
Ярим ой ва юлдузлар, яшил ранг, ранглар орасидаги қизил чизиқлар…
Бу деталларнинг бирортаси бош жамоамиз либосида сўнгги 15 йилда бирор маротаба кўриниш бермади. Айниқса, охирги 5 йилликда ҳолат янада ёмонлашди. Термамиз «Joma» бренди тақдим этган қопсимон либосларда ўйнашга мажбур бўлган чоғлари терманинг юзи ҳисобланадиган «форма»миз кўп бор танқид остига олинди, лекин ҳеч қандай ўзгаришлар юз бермади.
Аввалари асосан «Puma» ёки «Adidas» логотипи туширилган либосларда ҳаракат қилган футболчиларимиз ўз вақтида дизайн ва бежиримлиги билан ҳеч қайси жамоадан орқада эмас эди. Аста-секинлик билан бу жабҳада ҳам оқсай бошладик…
Турнир арафасида «Adidas» брендининг мижози бўлишга яқин турган эдик, қаердандир пайдо бўлган «Jako» билан имзоланган камхарж шартнома ҳаммасини чипакка чиқарди.
Эрон терма жамоасининг ЖЧ-2014 мусобақасида кийган либоси бутун дунёни ўзига қарата олган эди. Давлат байроғи асосида танланган ранглар уйғунлиги ва гепарднинг сурати туширилган футболка ва шунга ўхшаш айрим кичкина деталлар либосни оммалаштириб юборганди.
Ўша йили ФИФА сайти айнан шу либосни турнирда иштирок этган энг чиройли формалардан бири, дея эълон қилган эди. Бу ҳам футбол оламидаги Эроннинг ютуғи десак, адашмаган бўламиз. Осиё давлатларининг ўзидан анча орқадамиз, Европа жамоалари билан ўзимизни солиштиришга, тўғриси, уялдик.
Янгиланиш ва юксалишни истар эканмиз, хоҳласак-хоҳламасак шу масала юзасида ҳам бош қотиришга тўғри келади.
Айни дамда, замонавий футбол дизайни ва имиджидан анча орқадамиз. ЎФА, албатта, бу масалада ҳам янги лойиҳаларни амалга оширишини кутиб қоламиз. Кўпчилик учун бу арзимаган омилдек кўриниши мумкин, лекин профессионалликни, ўсишни хоҳлаяпмизми, демак, ишни кичик деталлардан бошлашимиз шарт! Акс ҳолда, одимлаш ўрнига ўз ўқимиз атрофида айланганча қолаверамиз.
Я.Улуғхўжаев.
