“Нант” кеча Ла-Маншдан танаси топилган Эмилиано Салани хотирасини абадийлаштириш учун бир иш қилди.

Франция клуби Сала ўйнаган 9-рақамни буткул муомиладан чиқарди.

Эмилиано Сала 19 январь куни “Нант”дан “Кардифф” сафига 20 миллион евро эвазига ўтган эди. Ушбу футболчи Уэлс жамоаси учун энг қиммат харид эди.

Аргентиналик футболчи “Кардифф” билан шартнома имзолагач, собиқ жамоадошлари билан хайрлашиш учун Францияга PA 46 Malibu самолётида қайтган эди.

21 январь куни худди шу самолётда Сала Кардифф томон йўлга чиққан. Самолёт билан алоқа душанба куни соат 20:00 ларда (маҳаллий вақт билан) узилган. Бундан олдин самолёт авиадиспечерлардан Ла-МаншнингГернси оролида фавқулодда қўнишни сўраган.

Полиция 22 январда қидирув-қутқарув ишларини бошлаб 24 январда тугатган эди. Саланинг қидирувига Нголо Канте, Сеск Фабрегас, Дмитри Пайет, Килиан Мбаппе каби футболчилар моддий ёрдам беришди.

Маълумот ўрнида, Эмилиано Сала “Бордо”, “Орлеан”, “Ньор”, “Кан” ва “Нант” жамоаларида тўп сурган .“Кардифф” сафида майдонга тушишга эса улгурмади.У эндигина 28 ёшга тўлган эди.