Осиё чемпионлар лигаси гуруҳ босқичининг 1-тури доирасида «Пахтакор» Теҳронда «Персеполис» клуби меҳмони бўлади. Учрашувдан олдин ташкил этилган матбуот анжуманида Шота Арвеладзе ва Егор Кримец иштирок этишди.

"Бу бизнинг гуруҳ босқичидаги биринчи ўйинимиз, оғир ўйин кутиб турибди. Улар ўтган йили финалда ўйнашган. Жудаям яхши футбол намойиш қиладиган жамоа. Мухлислар стадионни деярли тўлдириб ўтиришади. Бу эса ажойиб футбол муҳитини тақдим этади.

Биз кимга қарши ўйнаётганимизни яхши биламиз. Уларнинг аввалги мавсумдаги ва жорий йилдаги ўйинларини ўрганиб чиқдик. Бу жамоа кучини биламиз.

Рақиб кўплаб ўзгаришлар қилди деб ўйламайман. 2-3 футболчи кетди, лекин ўша мураббий ва фалсафа қолган. Улар агрессив ўйин кўрсатишади, жипсқоқлик билан ҳаракат қилишади", — деди Арвеладзе.

"Бизни эртага жуда қийин ўйин кутмоқда. Гуруҳ босқичида хато қилиш керак эмас. Биз янги жамоа билан янги мақсадлар сари бормоқдамиз. Рақибимиз кучли футболчиларга эга. Уларни кўплаб мухлислар қўллаб туради", — деди Егор Кримец.