Беларуснинг Гомель шаҳрида дзюдо бўйича анъанавий “Прайд Кубоги” номли мусобақа бўлиб ўтди.
13 ва ундан кичик ёшдаги болалар ўртасида ташкил қилинган мусобақада 11 мамлакатдан ташриф буюрган ёш дзюдочилар иштирок этишди.
1000 нафарга яқин ёшларни ўзида жам қилган турнирда бизнинг вакилларимиз ҳам юқори натижаларни қўлга киритдилар. Мусобақада терма жамоамизга Ўлмас Гуллиев раҳбарлик қилди.
Натижаларга тўхталадиган бўлсак, Ином Баҳодиров ўз вазн тоифасида барча рақибларини мағлубиятга учратиб олтин медалга сазовор бўлган бўлса, Убайдулло Ботиров ҳамда Иноятулло Телмонов шоҳсупанинг учинчи поғонасига кўтарилишди.
