Бугун Суперлига 2-тур доирасида "Локомотив" ўз майдонида Наманганнинг "Навбаҳор" жамоасини қабул қилади. Маълумот ўрнида шуни айтиш мумкин, ҳар икки жамоа шу пайтгача Ўзбекистон миллий чемпионати доирасида ўзаро 30та ўйин ўтказган. Бугунги учрашув эса 31-чиси бўлади.
Шу пайтгача бўлиб ўтган 30та беллашувнинг 17тасида "Локомотив" зафар қучган. 5та ўйинда дуранг қайд этилган бўлиб, 8 бор "Навбаҳор" ғалабага эришган. Тўплар нисбати бўйича умумий кўрсаткич "Локомотив" фойдасига 54-39.
"Локомотив" 2016 йил ўз майдонида "Навбаҳор"ни 5:0 ҳисобида мағлуб этган. Бу жамоалар ўртасидаги энг йирик ҳисоб бўлиб турибди. 2007 йил Наманганда ўтган баҳс голларга бой бўлган ва бунда майдон эгалари 6:2 ҳисобида зафар қучган.
Ўзаро ўйинларда "Локомотив" шу пайтгача 56, "Навбаҳор" эса 29 очкони қўлга киритган. Тошкентда ўтказилган 15та ўйиннинг 12таси "Локо" фойдасига ҳал бўлган. Икки бор дуранг қайд этилган бўлса, фақат бир марта омад "Навбаҳор" томонида бўлган.
Ўтган йил Тошкентда ўтказилган ҳар икки учрашувда ҳам "Локомотив"нинг қўли баланд келган. Суперлига биринчи босқич ўйинида "темирйўлчилар" 3:1 ҳамда иккинчи босқичда 1:0 ҳисобида зафар қучишган.
