Бугун мамлакат миллий чемпионати - Coca Cola Суперлигада 3-тур ўйинлари бошланади. Турни пойтахтимиздаги "Локомотив" стадиони "Локомотив" - "Андижон" жамоалари учрашуви билан очиб беради.

Эртага эса Тошкентда яна битта учрашув бўлиб ўтади. Бу йилги чемпионат карвонбошиси – “Пахтакор” ўз майдонида “Насаф”га қарши баҳс олиб боради.

Шанба оқшомидан иккита учрашув ўрин эгаллаган. Қадимий ва ҳамиша навқирон Самарқанд шаҳрида кучлилар сафига қайтган “Динамо” ҳамшаҳарларимиз – “Металлург” жамоасини қабул қилади. Шу куни Фарғонадаги “Истиқлол” стадионида “Навбаҳор” – “Бунёдкор” жамоалари учрашуви ҳам бўлиб ўтади.

Якшанба кунги дастурга учта ўйин киритилган: “Бухоро” – “Қизилқум”, АГМК – “Қўқон 1912”, “Сўғдиёна” – “Сурхон”.

“Металлург” жамоаси эртага Самарқанд шаҳри сари йўлга отланади. Андрей Шипилов етакчилигидаги жамоамиз “Бухоро” билан ўйиндан кейин икки кун дам олди ва душанбадан эътиборан 3-турга тайёргарликни бошлаб юборди. Айни пайтда жамоа аъзоларининг кайфиятлари аъло ва улар “Динамо”га қарши учрашувга пухта ҳозирланишмоқда.