Бангкокда ўтаётган бокс бўйича Осиё чемпионатининг тўртинчи кун дастурида Ҳасанбой Дўсматов ҳиндистонлик Амит Пангалга қарши чорак финал жанги учун рингга кўтарилди.
-52 кг вазн тоифасидаги баҳсларда тажрибали рақибга қарши жанг Дўсматовнинг мағлубияти билан якунланди ва у турнирни эрта тарк этадиган бўлди.
Қайд этиш керакки, Амит Ҳасанбой Дўсматов учун жиддий рақиб ҳисобланарди. Ҳасанбой бу 22 ёшли боксчи билан бир неча бор тўқнаш келган, 2017 йили Ҳамбургда ўтказилган жаҳон чемпионатида чорак финалдаги ўзаро жангдан кейин ҳам уни ўзи учун ноқулай рақиб сифатида атаганди. Бу икки боксчи 2017 йилиТошкентда ўтказилган Осиё чемпионатида ҳам ўзаро жанг қилган ва ўзбекистонликспортчи қийинчилик билан ғалаба қозонганди. 2018 йилги Осиё ўйинларида эса Амит финалда ғалабага эришиб, Дўсматовни олтин медалдан маҳрум қилганди.
Шу тариқа, Осиё чемпионатида Ўзбекистон бокс терма жамоаси илк йўқотишга учради - бунгача Ўзбекистон вакилларидан тўрт нафари ярим финал йўлланмасини ҳал қилганди.
