«Время футбола» канали яқиндагина Голландиянинг «Аякс» футболчилари томонидан ЙЧЛ ҳақида билдирилган фикрларини  эълон қилди. Биз энг қизиқ интевюларни сайтимизда эълон қилишга қарор қилдик.

Эрик тен Хаг

Бу тўрт жамоа ичида биз аутсайдер эканлигимиз аниқ. Шунга қарамасдан, аутсайдер ҳеч қачон чемпион бўлмайди, дейиш ҳам ноўрин. Биз «Реал Мадрид» ва «Ювентус»га қарши кечган учрашувларда аутсайдер бўла туриб, ғолибликни қўлга киритдик. Нега энди чемпион бўлмаслигимиз керак? Бизни кўпчилик тажрибасиз жамоа деб ўйлаяпти. Биласизми, биз Европанинг гранд жамоаларини меҳмонда мағлубиятга учратдик. Биз учун бунданда каттароқ тажрибани ҳеч ким бера олмайди, деб ҳисоблайман. Финалда ким билан ўйнашнинг менга фарқи йўқ. Асосийси, «Тоттенҳем»дан ўтиб олишимиз керак. Улар билан бизнинг ўхшашлик томонларимиз кўп. Шундай экан, ҳозирча улар ҳақида ўйласак, тўғрироқ бўлар эди.

Френки Де Йонг

Менимча бизга финалда «Барселона» тўқнаш келгани маъқул. Уларнинг ўйин услуби бизникига ўхшаш. «Ливерпуль» тезкор футбол намойиш қилади ва ўйин давомида кўплаб вазиятлар яратади. Қолганларни билмадиму, шахсан мен бўлажак жамоадошларим билан финалда тўқнаш келишни жуда ва жуда истаяпман.

Маттейс де Лигт

Биз ярим финал учрашувларига қизғин тайёргарлик олиб боряпмиз. Умид қиламизки, ҳаммаси биз хоҳлагандек якун топади ва биз, албатта, финалга чиқамиз. «Тоттенҳем» тартиб ва интизомни ҳуш кўрадиган кучли клуб. «Ливерпул» ва «Барселона» клубларнинг финал учун имкониятларини тенг баҳолайман, лекин «Метрополитано» стадионида «Барселона» билан учрашсак, айни муддао бўлар эди. Нега дейсизми? Биз Роналдуси бор «Ювентус»ни мағлубиятга учратдик. Агар Мессиси бор «Барселона»ни енгсак, бу клубимиз учун тарихий ғалабага айланади.

Ҳаким Зиеш

Ўйлашимча, биз учун финалда ким билан тўқнаш келишимизнинг аҳамияти йўқ. Уларнинг иккиси ҳам бирдек ҳавфли жамоалар. Энг муҳими, биз ўз ўйинимиз устида ишлашимиз ва ярим финалдан ўтиб олишимиз керак. Агарда биз ўз ўйинимизни кўрсатсак, бизга кимга қарши тўп суришнинг умуман аҳамияти йўқ