«Vremya futbola» kanali yaqindagina Gollandiyaning «Ayaks» futbolchilari tomonidan YCHL haqida bildirilgan fikrlarini e’lon qildi. Biz eng qiziq intevyularni saytimizda e’lon qilishga qaror qildik.
Erik ten Xag
Bu to‘rt jamoa ichida biz autsayder ekanligimiz aniq. Shunga qaramasdan, autsayder hech qachon chempion bo‘lmaydi, deyish ham noo‘rin. Biz «Real Madrid» va «Yuventus»ga qarshi kechgan uchrashuvlarda autsayder bo‘la turib, g‘oliblikni qo‘lga kiritdik. Nega endi chempion bo‘lmasligimiz kerak? Bizni ko‘pchilik tajribasiz jamoa deb o‘ylayapti. Bilasizmi, biz Yevropaning grand jamoalarini mehmonda mag‘lubiyatga uchratdik. Biz uchun bundanda kattaroq tajribani hech kim bera olmaydi, deb hisoblayman. Finalda kim bilan o‘ynashning menga farqi yo‘q. Asosiysi, «Tottenhem»dan o‘tib olishimiz kerak. Ular bilan bizning o‘xshashlik tomonlarimiz ko‘p. Shunday ekan, hozircha ular haqida o‘ylasak, to‘g‘riroq bo‘lar edi.
Frenki De Yong
Menimcha bizga finalda «Barselona» to‘qnash kelgani ma’qul. Ularning o‘yin uslubi biznikiga o‘xshash. «Liverpul» tezkor futbol namoyish qiladi va o‘yin davomida ko‘plab vaziyatlar yaratadi. Qolganlarni bilmadimu, shaxsan men bo‘lajak jamoadoshlarim bilan finalda to‘qnash kelishni juda va juda istayapman.
Matteys de Ligt
Biz yarim final uchrashuvlariga qizg‘in tayyorgarlik olib boryapmiz. Umid qilamizki, hammasi biz xohlagandek yakun topadi va biz, albatta, finalga chiqamiz. «Tottenhem» tartib va intizomni hush ko‘radigan kuchli klub. «Liverpul» va «Barselona» klublarning final uchun imkoniyatlarini teng baholayman, lekin «Metropolitano» stadionida «Barselona» bilan uchrashsak, ayni muddao bo‘lar edi. Nega deysizmi? Biz Ronaldusi bor «Yuventus»ni mag‘lubiyatga uchratdik. Agar Messisi bor «Barselona»ni yengsak, bu klubimiz uchun tarixiy g‘alabaga aylanadi.
Hakim Ziyesh
O‘ylashimcha, biz uchun finalda kim bilan to‘qnash kelishimizning ahamiyati yo‘q. Ularning ikkisi ham birdek havfli jamoalar. Eng muhimi, biz o‘z o‘yinimiz ustida ishlashimiz va yarim finaldan o‘tib olishimiz kerak. Agarda biz o‘z o‘yinimizni ko‘rsatsak, bizga kimga qarshi to‘p surishning umuman ahamiyati yo‘q
