Президентимиз томонидан илгари сурилган 5 та муҳим ташаббусдан бири бўлган ёшларни жисмоний чиниқтириш, уларнинг спорт соҳасида қобилиятини намоён қилиши учун зарур шароит яратишга йўналтирилган иккинчи ташаббус доирасида республикамизнинг барча ҳудудларида қатор оммавий спорт тадбирлари, қизиқарли беллашувлар, спорт усталари билан учрашувлар ўтказилмоқда.

2019 йилнинг май ойини “Спорт ойлиги” деб эълон қилинганлиги ҳам мазкур йўналишдаги ишларнинг янада жадаллашишига, аҳолининг, айниқса ёшларнинг жисмоний тарбия ва спортга бўлган қизиқишини оширишиши хизмат қилади. 

Бугун, 1 май куни республикамизнинг барча ҳудудларида “Спорт ойлиги” бошланиши муносабати тантанали тадбирлар ўтказилди.

Жумладан, Самарқанд шаҳридаги “Динамо” марказий стадионида “Спорт ойлиги”га тантанали тарзда старт берилди.

Ушбу оммавий спорт байрамида 5000 нафарга яқин ёшлар иштирок этиб, вилоятнинг таниқли санъаткорлари иштирокида маданий дастур, 15 та спорт тури бўйича 500 нафар ёшлар ва ҳарбийлар томонидан кўргазмали чиқишлар намойиш этилди.